وفاقی کابینہ نے غیر ملکی سرمایہ کاری اور سرکاری امور کی انجام دہی کے لیے وفاقی حکومت کو نجی کنسلٹنٹس کی خدمات حاصل کرنے کی منظوری دے دی۔

ذرائع کے مطابق وفاقی کابینہ نے وزارت منصوبہ بندی کی سمری سرکولیشن کے ذریعے منظور کر لی ہے۔

سمری کے مطابق وفاقی حکومت، وزارتوں اور ڈویژنز کو نجی شعبے کے کنسلٹنٹس کی تعیناتی کے لیے پیپرا رولز سے چھوٹ دی گئی ہے۔

کنسلٹنٹ، پبلک پرائیویٹ پارٹنرشپ کے قوانین کے تحت تعینات کیے جائیں گے۔

کنسلٹنٹ کی تعیناتی کی تجویز خصوصی سرمایہ کاری سہولت کونسل (ایس آئی ایف سی) کی ایگزیکٹو کمیٹی کے اجلاس میں پیش کی گئی تھی۔

دستاویز کے مطابق ایس آئی ایف سی نے قومی مفاد میں وفاقی حکومت کو نجی کنسلٹنٹ کمپنیوں سے معاہدوں کی تجویز دی تھی۔

وفاقی حکومت نجی کنسلٹنٹس کے معاہدے کرے گی اور سرمایہ کاری، دیگر امور کے لیے خدمات حاصل کی جائیں گی۔