کراچی میں غیر ملکی شہریوں پر حملے کی تحقیقات میں اہم پیش رفت ہوئی ہے اور حملے میں مارا گیا دہشت گرد سرکاری ادارے کا برطرف اہلکار نکلا۔

ڈان نیوز کے مطابق کراچی کے علاقے لانڈھی میں غیر ملکی شہریوں پر حملے کی تحقیقات جاری ہیں اور تازہ ترین پیشرفت کے مطابق حملے میں مارا گیا دہشت گرد بلوچستان لیویز کا برطرف اہلکار نکلا۔

تفتیشی ذرائع کے مطابق دہشت گرد سہیل نے سال 2014 میں دہشت گرد تنظیم بی ایل ایف میں شمولیت اختیار کی اور ان کا سرگرم ٹارگٹ کلر تھا۔

مزید کے لیے کلک کریں

انہوں نے بتایا کہ سہیل کو صرف ہائی پروفائل لوگوں کو ٹارگٹ کے لیے بھیجا جاتا تھا اور دہشت گرد سہیل نے کالعدم تنظیم کا رکن ہوتے ہوئے سرکاری ادارے کو جوائن کیا اور سال 2017 سے سال 2022 تک وہاں خدمات انجام دیتا رہا۔

ذرائع کے مطابق دہشت گرد تنظیم سے تعلق کے انکشاف پر ملزم فیملی ساتھ ملک سے فرار ہوگیا تھا اور افغانستان میں پناہ حاصل کی تھی۔

ان کا کہنا تھا کہ سہیل نے سال 2022 میں افغانستان میں ہی بی ایل ایف سے علیحدگی اختیار کر کے بی ایل اے جوائن کر لی تھی جس کے بعد وہ افغانستان سے چمن آیا اور وہاں سے کوئٹہ کے راستے کراچی کی راہ لی تھی۔

براستہ حب چوکی کراچی پہنچاغیر ملکیوں پر حملے میں مارے گئے دہشت گرد سہیل کے پانچ بہن بھائی ہیں اور پانچوں بہن بھائی مفرور ہیں۔

یاد رہے کہ گزشتہ روز کراچی کے علاقے لانڈھی میں خودکش دھماکے کے ذریعے غیر ملکی شہریوں کی گاڑی کو نشانہ بنایا گیا تھا جس میں تمام غیر ملکی محفوظ رہے تھے تاہم حملے میں 2 دہشت ہلاک ہوگئے تھے۔