کراچی میں تین افراد کھلے مین ہول میں گر گئے جن میں سے دو افراد جاں بحق اور ایک زخمی ہوگیا۔

’ڈان نیوز‘ کی رپورٹ کے مطابق حادثہ کراچی کے علاقے پورٹ قاسم میں فرٹیلائزرز کمپنی کے قریب پیش آیا۔

ریسکیو حکام نے بتایا کہ مین ہول میں گرنے والے 3 افراد میں سے 2 دم توڑ گئے جب کہ ایک شہری ہے، ریسکیو حکام کا مزید کہنا تھا کہ زخمی شخص کو طبی امداد کی فراہمی کے لیے ہسپتال منتقل کردیا گیا ہے۔

خیال رہے کہ نومبر میں کراچی کے علاقے ملیر کے میمن گوٹھ میں ایک کھلے مین ہول میں گرنے سے 2 سالہ بچی جاں بحق ہوگئی تھی۔

واضح رہے کہ اس سے قبل رواں سال اگست میں دو بچے مین ہول میں گر کر جاں بحق ہو گئے تھے۔

15 اگست کو میمن گوٹھ میں اپنے والدین کے ہمراہ دعوت پر جانے والا 3سالہ بچہ نعمان مین ہول میں گر کر جاں بحق ہوگیا تھا۔

اس واقعے کے دو ہفتے بعد 31 اگست کو مواچھ گوٹھ کے علاقے موچکو میں مین ہول نے کمسن بچی کی جان لے لی تھی۔