بلاول نے نجی ٹی وی سے گفتگو کرتے ہوئے پیپلز پارٹی کو ووٹ دینے پر عوام کا شکریہ ادا کیا اور اس الیکشن میں کامیابی پر پاکستان پیپلز پارٹی کے سپورٹرز، ووٹرز کو مبارکباد دیتے ہوئے ان کا شکر گزار بھی ہوں۔

انہوں نے کہا کہ ابھی تک جو نتائج ہیں ان کے مطابق پاکستان پیپلز پارٹی واحد جماعت ہے جس کی چاروں صوبوں میں نمائندگی موجود ہے اور میں سمجھتا ہوں یہ ہمارے لیے سب سے بڑی کامیابی ہے۔

ان کا کہنا تھا کہ ابھی تک پورے نتائج نہیں آئے ہیں ، ہمیں پوری گنتی بھی نہیں پتا اور آزاد امیدواروں نے بھی اپنا فیصلہ سنایا ہے کہ وہ کیا فیصلہ کرنے جا رہے ہیں تو یہ کہنا قبل از وقت ہو گا کہ کون کہاں حکومت بنا رہا ہے۔

پیپلز پارٹی کے چیئرمین نے کہا کہ بلوچستان، پنجاب اور وفاق میں پیپلز پارٹی کے بغیر حکومت نہیں بن سکتی، ابھی تک پیپلز پارٹی کی مسلم لیگ(ن)، تحریک انصاف یا کسی اور جماعت کے ساتھ کوئی باضابطہ بات چیت نہیں ہوئی، ہم اس چیز کے انتظار میں ہیں کہ پہلے پوری گنتی سامنے آ جائے۔

ان کا کہنا تھا کہ پیپلز پارٹی کی سینٹرل ایگزیکٹو کمیٹی نے مجھے ویزراعظم نامزد کیا ہے اور اگر مجھے وہ فیصلہ تبدیل کرنا ہے تو ایک بار پھر مجھے سینٹرل ایگزیکٹو کمیٹی کو بلانا پڑے گا اور ہم پھر اتفاق رائے سے یہ فیصلہ کریں گے کہ پیپلز پارٹی کو کیسے آگے بڑھنا ہے۔

مزید کے لیے کلک کریں

انہوں نے کہا کہ جو ہونا تھا وہ ہو گیا، پاکستان کے مفاد میں یہ ہے کہ ہم سیاسی اتفاق رائے پیدا کرنے کی کوشش کریں کیونکہ اب ہمیں آگے جو سفر طے کرنا ہے اس حوالے سے ہم پاکستان کے عوام کے لیے مثبت تبدیلی لانا چاہتے ہیں۔

بلاول نے کہا کہ اگر سیاسی عدم استحکام کو حل کیے بغیر حکومت تشکیل دی گئی تو ایسی حکومت کو عوام کی مشکلات حل کرنے میں مشکلات کا سامنا کرنا پڑے گا۔

ایک سوال کے جواب میں انہوں نے کہا کہ میں اکیلا تو حکومت نہیں بناؤں گا تو شاید اپنی ہر پالیسی پر عمل نہ کر سکوں، معاشی بہتری کے لیے ہمیں بہت سے ایسے اقدامات کرنے چاہئیں جو پاکستان میں خوشحالی لا سکیں۔

ان کا کہنا تھا کہ جو بھی حکومت بنے گی تو ہم اپنے اتحادیوں سمیت سر جوڑ کر بیٹھیں گے اور اگر ہم سب مل کر یہ فیصلہ کرتے ہیں کہ نجکاری ہی وہ حل ہے تو پھر نجکاری کا راستہ اپنا پڑے گا، اگر میں میں اپنے پبلک پرائویٹ پارٹنرشپ پر قائل کرنے میں کامیاب رہا تو ہم ایسا کریں گے۔