احسن اقبال نے دانیال عزیز کی گرفتاری میں ملوث ہونے کے الزام کو مسترد کر دیا ہے۔

ڈان نیوز کے مطابق دانیال عزیز کی اہلیہ مہناز اکبر عزیز نے سوشل میڈیا پلیٹ فاریم ’ایکس‘ پر جاری بیان میں بتایا کہ پولیس کی بھاری نفری نے دانیال عزیز کو شکر گڑھ سے گرفتار کرلیا۔

دانیال عزیز کی اہلیہ نے الزام لگاتے ہوئے کہا کہ دانیال عزیز کے اوپر بدترین تشدد بھی ہوا ہے اور انہیں زبردستی گاڑی میں ڈالا گیا، ان کی گرفتاری میں احسن اقبال کا ہاتھ ہے۔

اس الزام کا جواب دیتے ہوئے سماجی رابطے کی ویب سائٹ ’ایکس‘ پر جاری بیان میں احسن اقبال کا کہنا تھا کہ براہ کرم جھوٹے الزامات نہ لگائیں، کل رات آپ کے شوہر کے حامیوں نے روپو چک میں ہمارے پولنگ ایجنٹ پر حملہ کیا اور اس کی گاڑی کو گولیاں لگیں ۔

انہوں نے بتایا کہ اس حادثے میں پولنگ ایجنٹ معجزانہ طور پر بچ گئے اور آج پھر ان کے حامیوں نے مختلف پولنگ اسٹیشنز پر تشدد کیا جس میں پولیس کو مداخلت کرنا پڑی۔