پشاور: دہشت گردوں کی فائرنگ سے پولیس اہلکار جاں بحق، ایک زخمی
چمن کورونہ میں دہشت گردوں نے ڈیوٹی کے بعد گھر جانے والے 2 پولیس اہلکاروں پر فائرنگ کی، زخموں کی تاب نہ لاتے ہوئے ایک اہلکار چل بسا۔
پشاور کے نواحی علاقے چمن کورونہ میں دہشت گردوں کی فائرنگ سے پولیس اہلکار جاں بحق جبکہ دوسرا زخمی ہوگیا۔
’ڈان نیوز‘ کے مطابق پشاور تھانہ ریگی کے نواحی علاقہ چمن کورونہ میں دہشت گردوں نے ڈیوٹی کے بعد گھر جانے والے 2 پولیس اہل کاروں پر فائرنگ کردی، جس سے دونوں زخمی ہوگئے۔
زخمی اہل کاروں کو ہسپتال منتقل کیا گیا جہاں زخموں کی تاب نہ لاتے ہوئے مرسلین نامی ایک اہلکار چل بسا۔
شہید ہونے والے اہلکار کی نماز جنازہ پورے سرکاری اعزاز کے ساتھ ملک سعد شہید پولیس لائن پشاور میں ادا کردی گئی جس میں شہید کے لواحقین اور پولیس افسران و اہلکاروں کی کثیر تعداد نے شرکت کی۔