کراچی: گلشن اقبال میں نوجوان کے قتل میں ’ملوث‘ ملزم گرفتار
ہم پستول چیک کر رہے تھے کہ گولی چل گئی جو زوہیب کو لگی اور وہ جان کی بازی ہار گیا، زیر حراست ملزم کا پولیس کو بیان
کراچی کے علاقے گلشن اقبال میں زوہیب نامی نوجوان کے قتل میں ملوث مبینہ ملزم کو پولیس نے گرفتار کرلیا۔
ڈان نیوز کے مطابق گزشتہ رات عابد آباد کے علاقے میں فائرنگ سے زوہیب نامی نوجوان جاں بحق ہوا تھا۔
پولیس نے قتل میں ملوث مقتول کے دوست علی کو حراست میں لے لیا، ابتدئی تفتیش کے مطابق مقتول زوہیب گاڑی کی ’ایسیسیریز‘ کا کام کرتا تھا۔
تفصیلات کے مطابق گزشتہ رات زوہیب اپنے دوست علی کی گاڑی کا کام کرا کر گاڑی واپس دینے اس کے گھر گیا تھا۔
پولیس کو دیے گئے بیان میں ملزم علی کا کہنا تھاکہ ہم دونوں پستول چیک کر رہے تھے کہ گولی چل گئی جو زوہیب کو لگی اور وہ جان کی بازی ہار گیا۔
پولیس حکام کا کہنا ہے کہ واقعہ کے حوالے سے مزید تحقیقات کی جا رہی ہیں۔