آفیشل سیکریٹ ایکٹ عدالت نے سائفر کیس میں پاکستان تحریک انصاف (پی ٹی آئی) کے سینئر رہنما شاہ محمود قریشی کی رہائی کی روبکار جاری کردی۔

خصوصی عدالت کے جج ابوالحسنات ذوالقرنین نے شاہ محمود قریشی کی روبکار جاری کی۔

آفیشل سیکریٹ ایکٹ عدالت کا عملہ روبکار لے کر اڈیالہ جیل روانہ ہوگیا تاہم رہائی کی روبکار جاری ہونے کے باوجود شاہ محمود قریشی کی رہائی ممکن نہیں۔

شاہ محمود قریشی کو نقص امن کے تحت 15 روز کے لیے نظر بند کیا گیا ہے۔

واضح رہے کہ ڈپٹی کمشنر راولپنڈی نے آج شاہ محمود قریشی کو 15 روز کے لیے نظر بند کرنے کا آرڈر جاری کردیا گیا تھا۔

جاری کردہ حکم نامے کے مطابق شاہ محمود قریشی کو 3 ایم پی او کے تحت نظر بند کیا گیا ہے، شاہ محمود قریشی 9 مئی کے واقعات میں نامزد ملزم ہیں اس کے لیے تفتیش درکار ہے۔