پاکستان اسٹاک ایکسچینج میں مسلسل دوسرے روز سے جاری شدید مندی کے بعد آج ابتدائی ٹریڈنگ کے دوران مثبت رجحان دیکھا گیا، تاہم یہ برقرار نہ رہ سکا اور کے ایس ای-100 انڈیکس 1124 پوائنٹس کمی کے بعد 62 ہزار کی سطح سے بھی نیچے آ گیا۔

پی ایس ایکس ویب سائٹ کے مطابق صبح تقریباً 10 بج کر 38 منٹ پر بینچ مارک کے ایس ای-100 انڈیکس 376 پوائنٹس یا 0.6 فیصد اضافے کے بعد 63 ہزار 209 کی سطح پر پہنچ گیا تھا۔

تاہم دوپہر تقریباً ایک بج کر 34 منٹ پر مثبت رجحان منفی میں تبدیل ہو گیا اور انڈیکس 1124 پوائنٹس یا 1.79 فیصد تنزلی کے بعد 61 ہزار 708 پر آگیا تھا۔

بعد ازاں، انڈیکس قدرے بحالی کے بعد 62 ہزار 448 پوائنٹس پر بند ہوا، یہ 385 پوائنٹس یا 0.61 فیصد تنزلی ہے، گزشتہ روز بینچ مارک کے ایس ای-100 انڈیکس 63 ہزار 252 پوائنٹس پر بند ہوا تھا۔

واضح رہے کہ گزشتہ روز (20 دسمبر) پاکستان اسٹاک ایکسچینج میں شدید مندی دیکھی گئی تھی اور بینچ مارک کے ایس ای-100 انڈیکس 2300 سے زائد پوائنٹس کی کمی کے بعد 63 ہزار کی سطح سے بھی نیچے آگیا تھا۔

اس سے ایک روز قبل ابتدائی ٹریڈنگ کے دوران مثبت رجحان کے بعد دوپہر میں مندی دیکھی گئی اور بینچ مارک کے ایس ای-100 انڈیکس 900 سے زائد پوائنٹس کم ہوگیا تھا۔

مزید کے لیے کلک کریں

یاد رہے کہ گزشتہ ہفتے کے آخری کاروباری روز کے ایس ای-100 انڈیکس 680 پوائنٹس اضافے کے بعد 66 ہزار پوائنٹس کی نفسیاتی حد عبور کر گیا تھا۔

گزشتہ چند ماہ سے پاکستان اسٹاک ایکسچینج میں ریکارڈ تیزی کا سلسلہ جاری ہے، 3 نومبر کو ساڑھے 6 سال بعد انڈیکس 53 ہزار پوائنٹس کی حد عبور کر گیا تھا، جبکہ 10 دسمبر کو کے ایس ای-100 انڈیکس پہلے 65 ہزار اور بعد ازاں تاریخ میں پہلی بار 66 ہزار کی نئی بُلند ترین سطح پر پہنچ گیا تھا۔

7 دسمبر کو پی ایس ایکس بینچ مارک کے ایس ای-100 انڈیکس 800 پوائنٹس اضافے کے بعد تاریخ میں پہلی بار 64 ہزار کی نئی بُلند ترین سطح پر پہنچ گیا تھا۔

6 دسمبر کو بھی پی ایس ایکس میں تاریخی سنگ میل عبور کرنے کا سلسلہ جاری رہا، اور بینچ مارک کے ایس ای-100 انڈیکس تاریخ میں پہلی بار 63 ہزار کی نئی بُلند ترین سطح پر پہنچ گیا تھا۔

اس سے قبل 4 دسمبر کو 100 انڈیکس 802 پوائنٹس یا 1.3 فیصد اضافے کے بعد 62 ہزار 493 پوائنٹس پر پہنچ گیا تھا۔