متحدہ عرب امارات میں قائم ریئل اسٹیٹ کمپنیوں کا ایک پاکستانی کاروباری گروپ ایسوسی ایشن آف بلڈرز اینڈ ڈیولپرز آف پاکستان (اے بی اے ڈی) کے ذریعے 20 سے 25 ارب ڈالر کی سرمایہ کاری کرے گا۔

ڈان اخبار کی رپورٹ کے مطابق اس بات کا اعلان متحدہ عرب امارات کی رئیل اسٹیٹ کمپنیوں کے ایک وفد نے کیا، جن میں المیر، حبیب گروپ اور مارک اسٹون شامل ہیں۔

حکومت پاکستان کے مشیر برائے اوورسیز پاکستانیز سردار قیصر حیات نے گزشتہ روز ایسوسی ایشن کے دورے کے دوران اس وفد کی قیادت کی۔

اے بی اے ڈی کی پریس ریلیز کے مطابق سردار قیصر حیات نے کہا کہ تعمیراتی شعبے میں متحدہ عرب امارات کی سرمایہ کاری سے نہ صرف خوشحالی آئے گی بلکہ رہائشی سہولیات کے بین الاقوامی معیار کو بھی متعارف کرایا جائے گا۔

انہوں نے کہا کہ بیرون ملک مقیم پاکستانی 20 سے 25 ارب ڈالر کی سرمایہ کاری کرنا چاہتے ہیں، ملک کی سیاسی اور عسکری قیادت نے بیرون ملک مقیم پاکستانیوں کو ان کی سرمایہ کاری کے تحفظ کی یقین دہانی کرائی ہے۔

انہوں نے کہا کہ اے بی اے ڈی تعمیراتی صنعت کی ترقی کے لیے پالیسیاں بنانے میں حکومت کی مدد بھی کر رہا ہے، یہ ایسوسی ایشن غیر ملکی کمپنیوں کے لیے سرمایہ کاری کا بہترین ذریعہ بن سکتی ہے۔