خیبرپختونخوا کے قبائلی ضلع پاراچنار کے علاقے سبزی منڈی میں صبح کے وقت جنگلی تیندوے نے حملہ کرکے 2 افراد کو زخمی کردیا۔

محکمہ جنگلی حیات کے مطابق پاراچنار کی سبزی منڈی میں آج علی الصبح جنگلی تیندوے نے حملہ کردیا جس کے نتیجے میں منڈی میں بھگڈر مچ گئی۔

حملے میں دو افراد زخمی ہوگئے جنہیں علاج کے لیے ڈسٹرکٹ ہیڈکوارٹرز ہسپتال (ڈی ایچ کیو) پاراچنار منتقل کردیا گیا ہے، جبکہ تیندوے کو قابو کرنے کے لیے محکمہ جنگلی حیات کی جانب سے اقدامات جاری ہیں۔

ڈاکٹروں کے مطابق دونوں زخمیوں کی حالت خطرے سے باہر ہے جبکہ جنگلی تیندوا حملے کے بعد سبزی منڈی کے ایک گودام میں گھس گیا ہے۔

محکمہ وائلڈ لائف کے منصف علی نے بتایا کہ تیندوے کو قابو کرنے کے لیے اقدامات جاری ہیں۔

مزید کے لیے کلک کریں

انہوں نے کہا کہ یہ پاراچنار میں اپنی نوعیت کا پہلا واقعہ ہے چونکہ یہاں کے محکمہ جنگلی حیات کے پاس کوئی خاص اوزار موجود نہیں ہیں اس لیے مجبوراً پشاور سے ٹیمیں بلائی گئی ہیں، امید ہے جلد تیندوے کو قابو کرلیا جائے گا۔

دوسری جانب تیندوے کو دیکھنے کے لیے مقامی افراد جن میں زیادہ تر اسکول کے بچے شامل تھے وہ سبزی منڈی پہنچ گئی۔

جنگلی تیندوا سبزی منڈی کے گودام میں موجود ہے جبکہ پولیس اور محکمہ جنگلی حیات لوگوں کو سبزی منڈی آنے اور رش لگانے سے منع کر رہے ہیں۔