کراچی میں کھلے گٹر نے ایک اور بچے کی جان لے لی جہاں مواچھ گوٹھ کے علاقے موچکو میں مین ہول نے کمسن بچی کی جان لے لی، جس کے بعد کراچی میں رواں مہینے مین ہول میں گر کر جاں بحق بچوں کی تعداد دو ہوگئی۔

موچکو پولیس کے ایس ایچ او شاہد چوہدری نے کہا کہ مواچھ گوٹھ کے علاقے غازی خان وارا میں 4 سالہ بچی کھلے گٹر میں گر گئی۔

پولیس افسر نے کہا کہ لڑکی اپنے گھر کے قریب کھیل رہی تھی کہ اسی دوران کھلے گٹر میں گئی۔

مزید کے لیے کلک کریں

ان کا کہنا تھا کہ ایدھی کارکنان نے ریسکیو آپریشن کر کے بچی کی لاش نکال لی جس کے بعد اسے ہسپتال لایا گیا جہاں ڈاکٹروں نے موت کی تصدیق کردی۔

پولیس نے کہا کہ لڑکی کی شناخت عمرہ بلوچ کے نام سے ہوئی ہے اور اس کے اہل خانہ نے پولیس کارروائی سے منع کر دیا ہے۔

یہ حال ہی میں پیش آنے والا اس طرح کا دوسرا واقعہ جہاں دو ہفتے قبل میمن گوٹھ میں بھی ایک بچہ کھلے مین ہول میں گر کر لقمہ اجل بن گیا تھا۔

15 اگست کو میمن گوٹھ میں اپنے والدین کے ہمراہ دعوت پر جانے والا 3سالہ بچہ نعمان مین ہول میں گر کر جاں بحق ہوگیا تھا۔

بچے کے والدین کے مطابق نعمان ان کے 4 بچوں میں اکلوتا بیٹا تھا اور ان کے عزیز کے گھر کے باہر کھیلتے ہوئے کئی دنوں سے کھلے ہوئے مین ہول میں گر کر جان کی بازی ہار گیا تھا۔

اس سے قبل رواں سال اپریل میں بھی اسی طرح کا ایک واقعہ پیش آیا تھا جب میاں بیوی مین ہول میں گر کر جاں بحق ہو گئے تھے۔