گلگت بلتستان کے ضلع غذر میں گاڑی حادثے کا شکار ہو کر گہری کھائی میں جاگری جس کے نتیجے میں ایک مسافر جاں بحق اور دیگر 14 زخمی ہوگئے۔

ریسکیور 1122 اور سیفٹی افسر غذر راجا اجمل نذیر نے حادثے کی تصدیق کرتے ہوئے بتایا کہ زخمیوں میں سے 3 افراد کی حالت تشویش ناک ہے۔

انہوں نے کہا کہ زخمیوں میں سے ایک گلگت ہسپتال جبکہ دو زخمیوں کو گوپس ہسپتال بھیج دیا گیا ہے۔

سیفٹی افسر کا کہنا تھا کہ تین زخمیوں کو غذر ڈسٹرکٹ ہیڈکوارٹرز ہسپتال منتقل کیا گیا تھا تاہم دیگر زخمیوں کو ابتدائی طبی امداد فراہم کرنے کے بعد گھروں کو روانہ کردیا گیا ہے۔

مزید کے لیے کلک کریں

ان کا کہنا تھا کہ گاڑی میں مجموعی طور پر 15 افراد سوار تھے جبکہ امدادی ٹیموں کو جائے حادثے کی طرف روانہ کردیا گیا ہے۔

راجا اجمل نذیر نے کہا کہ علاقے میں ٹیلی مواصلاتی نظام نہ ہونے سے مکمل اور فوری معلومات نہیں مل رہی ہیں۔

اس سے قبل گزشتہ ہفتے گلگت بلتستان کے ضلع دیامر میں قراقرم ہائی وے کے قریب تھیلچی کے مقام پر سیاحوں کی گاڑی بھی حادثے کا شکار ہوئی تھی جہاں 6 افراد جاں بحق اور 17 زخمی ہوگئے تھے۔

اسی طرح گزشتہ ہفتے ہی گلگت جانے والی گاڑی خیبرپختونخوا کے ضلع لوئر کوہستان میں گہری کھائی میں گر گئی تھی اور اس کے نتیجے میں 4 افراد جاں بحق ہوئے تھے۔

خیال رہے کہ رواں ماہ کے اوائل میں مانسہرہ کی انتظامیہ نے مون سون بارشوں کے باعث خیبرپختونخوا اور گلگت بلتستان کے درمیان لوگوں کو سفر کرنے کی ممانعت کی تھی۔

گزشتہ ماہ 13 جون کو وزیر اعلیٰ گلگت بلتستان کے کوآرڈینیٹر مزمل حسن اپنے والدین سمیت ٹریفک حادثے میں جاں بحق اور ان کی ہمشیرہ شدید زخمی ہوگئی تھیں۔

مزید کے لیے کلک کریں

ریسکیو 1122 کے میڈیا کوآرڈینیٹر شیر باز نے بتایا تھا کہ حادثہ شاہراہ بلتستان میں شنگوس کے مقام پر پیش آیا جہاں ان کی گاڑی موڑ کاٹتے ہوئے نالے میں جاگری، گاڑی میں سوار وزیر اعلیٰ کے کوآرڈینیٹر مزمل حسن ایڈووکیٹ، ان کے والد اور والدہ موقع پر ہی جاں بحق ہوگئے تھے۔

اس سے قبل 7 فروری کو خیبرپختونخوا کے علاقے شتیال میں مسافر بس مخالف سمت سے آنے والی کار سے ٹکرا گئی تھی جس کے نتیجے میں 21 افراد جاں بحق اور 12 زخمی ہوگئے تھے، مسافر بس گلگت بلتستان سے راولپندی جا رہی تھی۔

ایس ایس پی شیر خان نے بتایا تھا کہ مسافر بس اور کار ٹکرانے کے بعد کھائی میں جاگری، جاں بحق ہونے والوں میں سے 16 افراد بس میں سوار تھے اور 5 افراد کار میں موجود تھے جبکہ دیگر 12 مسافر زخمی ہوگئے تھے۔