وفاقی وزیر صحت عبدالقادر پٹیل نے کہا کہ عمران خان جب وزیراعظم تھا تو اس وقت بھی میں نے کہا تھا کہ یہ دماغی طور پر درست نہیں ہے، اس کو میوزیم میں رکھو، اس طرح کی دوسری چیز آپ کو نہیں ملے گی۔

اسلام آباد میں پریس کانفرنس کرتے ہوئے وفاقی وزیر صحت نے کہا کہ نارسسٹ جھوٹ بولتا ہے اور اپنے جھوٹ پر بضد ہوتا ہے، اپنے جھوٹ کو سچ کہتا ہے اور اس کو دوسروں سے سچ منوانے کی کوشش کرتا ہے۔

ان کا کہنا تھا کہ پچھلے دنوں جو حالات گزرے ہیں وہ ایک دن کا نہیں ہے بلکہ یہ تو نارسسٹ برسوں سے تبلیغ کر رہا ہے اور جب سے حکومت سے نکالا گیا تو نوجوانوں کو ایک راستے پر لگایا اور اس کا نتیجہ سب نے دیکھا۔

عبدالقادر پٹیل نے کہا کہ اس نے سیاست کو تباہ پہلے دن کردی تھی، سیاست میں ایک شائستگی کا رواج تھا وہ تباہ ہوگیا، ثقافت یعنی ماں، بہو، بیٹی کی عزت کا فیبرک تباہ ہوگیا، سیاسی اختلاف دشمنی میں بدل گئی۔