وزیر خزانہ سینیٹر اسحٰق ڈار نے امریکی سفارت کار ڈونلڈ بلوم سے ملاقات کرکے انہیں پاکستان کے معاشی منظرنامے اور ملک کو درپیش چلینجز سے آگاہ کیا۔

فنانس ڈویژن کی طرف سے جارہ کردہ بیان کے مطابق وفاقی وزیر خزانہ و محصولات سینیٹر اسحٰق ڈار نے امریکی سفیر سے ملاقات کے دوران کہا کہ حکومت ملک کو معاشی استحکام کی راہ پرگامزن کرنے اور بین الاقوامی مالیاتی فنڈ کے پروگرام کو مکمل کرنے میں پرعزم ہے۔

وزیر خزانہ نے کہا کہ پاکستان امریکا کے ساتھ دوطرفہ تجارتی اور سرمایہ کاری کے تعلقات کو مزید گہرا کرنے کا خواہش مند ہے۔

وزیر خزانہ نے امریکی سفیر کا خیرمقدم کیا اور امریکا کے ساتھ اقتصادی اور تجارتی شعبوں میں قائم گہرے تاریخی اور پائیدار دوطرفہ تعلقات پر روشنی ڈالی۔

وزیر خزانہ نے امریکی سفیر کو ملک کی معاشی صورتحال اور درپیش مسائل سے آگاہ کیا۔

انہوں نے اقتصادی زوال کو روکنے اور معیشت کو معاشی استحکام و نمو کے لیے حکومت کی جانب سے کیے جانے والے عملی پالیسی فیصلوں پرروشنی ڈالی۔

انہوں نے امریکی سفیرکو بین الاقوامی مالیاتی فنڈ (آئی ایم ایف) کے ساتھ ہونے والے مذاکرات میں پیش رفت سے بھی آگاہ کیا اور پروگرام کو مکمل کرنے کے لیے حکومت کے عزم کا اعادہ کیا۔

اس موقع پر امریکی سفیر ڈونلڈ بلوم نے ملک کی معاشی استحکام اور عوام کی سماجی و اقتصادی ترقی کے لیے حکومت کی پالیسیوں اور پروگراموں پر اعتماد کا اظہار کیا۔

انہوں نے دونوں ممالک کے درمیان دوطرفہ اقتصادی، سرمایہ کاری اور تجارتی تعلقات کو مزید فروغ دینے کے لیے اپنی حمایت کا اظہار بھی کیا۔

ملاقات میں مشترکہ دلچسپی کے امور پر تبادلہ خیال اور دونوں ممالک کے درمیان موجودہ دوطرفہ تعلقات کو بڑھانے میں اپنی دلچسپی کا اظہار کیا گیا۔

دونوں سربراہان نے مختلف اقتصادی شعبوں کا بھی جائزہ لیا جہاں دونوں ممالک اپنے تعلقات کو مزید مضبوط کر سکتے ہیں۔

وزیر خزانہ نے امریکی سفیر کا شکریہ ادا کیا اور حکومت کی جانب سے امریکا کے ساتھ دوطرفہ تجارتی اور سرمایہ کاری کے تعلقات کو مزید گہرا کرنے کی خواہش کا اعادہ کیا۔

خیال رہے کہ آئی ایم ایف رواں برس فروری سے 1.1 ارب ڈالر کی قسط جاری کرنے کے لیے پاکستان سے مذاکرات کر رہا ہے جو کو 2019 میں 7 ارب ڈالر کے قرض کے لیے ہونے والے معاہدے کا حصہ ہے۔