صحافی ارشد شریف کے قتل کے خلاف ازخود نوٹس کی سماعت کے دوران چیف جسٹس عمر عطا بندیال نے ریمارکس دیے کہ بہت دکھ ہے کہ ارشد شریف کیس میں کوئی پیش رفت نہیں ہوئی، دفتر خارجہ 2 ممالک سے کیس میں مدد لینے میں ناکام رہا۔

سینیئر صحافی ارشد شریف قتل پر ازخود نوٹس کیس کی سماعت چیف جسٹس عمر عطا بندیال کی سربراہی میں پانچ رکنی لارجر بنچ نے کی۔

ارشد شریف کی والدہ نے سپریم کورٹ کے ازخود نوٹس پر اعتراض کردیا، ارشد شریف کی والدہ کے وکیل شوکت عزیز صدیقی نے کہا کہ سپریم کورٹ کی کارروائی پر تحفظات ہیں۔

وکیل والدہ ارشد شریف نے عدالت کو بتایا کہ ارشد شریف کی والدہ اپنے مؤقف کے مطابق فرسٹ انفارمیشن رپورٹ (ایف آئی آر) درج کرانا چاہتی ہیں۔

وکیل نے مؤقف اپنایا کہ قانون کے مطابق سپریم کورٹ ارشد شریف کیس کی تحقیقات کی نگرانی نہیں کرسکتی۔

مرحوم ارشد شریف کی والدہ کے وکیل نے کہا کہ ہماری استدعا ہے کہ ارشد شریف کیس میں گناہ گاروں کو سزا ملے اور بے گناہ لپیٹ میں نہ آئے، جس پر جسٹس اعجاز الاحسن نے کہا کہ ہم یہاں کسی کو سزا اور بری نہیں کر رہے صرف تحقیقات میں سہولیات فراہم کر رہے ہیں۔

مزید کے لیے کلک کریں

وکیل شوکت عزیز صدیقی نے دلائل دیے کہ سپریم کورٹ شہناز بی بی کیس میں واضح کر چکی کہ عدالت کے پاس نگرانی کرنے کا اختیار نہیں ہے، سپریم کورٹ سے درخواست ہے کہ اس کیس کی نگرانی نہ کرے، یہ معاملہ جسٹس فار پیس کو بھجوایا جائے۔

جسٹس مظاہر علی اکبر نقوی نے ریمارکس دیے کہ سپریم کورٹ تحقیقات کی نگرانی کر سکتی ہے۔

شوکت عزیز صدیقی نے کہا کہ کیا سپریم کورٹ نے اپنے فیصلے پر نظرثانی کرلی ہے یا فیصلہ بدل گیا ہے، جس پر جسٹس جمال خان مندوخیل نے کہا کہ آپ اپنی آواز نیچی رکھیں، کیا ہم یہ کیس نہ سنیں؟

چیف جسٹس عمر عطا بندیال نے ریمارکس دیے کہ ہم نے ایک نامور صحافی کے قتل پر از خود نوٹس لیا، سپریم کورٹ صحافت کے شعبے کا بے حد احترام کرتی ہے، بنیادی انسانی حقوق کی خاطر عدالت نے از خود نوٹس لیا۔

انہوں نے استفسار کیا کہ اکتوبر کو قتل ہوا، عدالتی نوٹس سے پہلے آپ کہاں تھے؟ ارشد شریف ایک اہم شعبے کے اہم فرد تھے۔

چیف جسٹس آف پاکستان نے ریمارکس دیے کہ بہت دکھ ہے ارشد شریف کیس میں کوئی پیشرفت نہیں ہوئی، دفتر خارجہ دو ممالک سے ارشد شریف کیس میں مدد لینے میں ناکام رہا۔

انہوں نے کہا کہ تحقیقات کی نگرانی نہیں بلکہ اداروں کو تحقیقات میں تعاون دے رہے ہیں، ہمارا مقصد کسی کو کیس میں شامل کرنا یا تحفظ دینا نہیں۔

ان کا کہنا تھا کہ ارشد شریف ایک صحافی اور ایک پاکستانی شہری تھا، قتل کے اس واقعے پر ہم بھی دکھی ہوئے۔

چیف جسٹس نے ریمارکس دیے کہ عدالت نے ازخود نوٹس فیکٹ فائنڈنگ رپورٹ آنے کے بعد لیا، فیکٹ فائنڈنگ رپورٹ میں کچھ پہلو تھے جن کی تحقیقات ضروری تھیں۔

مزید کے لیے کلک کریں

چیف جسٹس عمر عطا بندیال نے کہا کہ عدالتی کارروائی شروع ہونے پر ہی مقدمہ درج ہوا، مشترکہ تحقیقاتی کمیٹی (جے آئی ٹی) کو حکومت فنڈز فراہم نہیں کر رہی تھی، سپریم کورٹ نے جے آئی ٹی کو فنڈز دلوائے اور وہ بیرون ملک گئی۔

جسٹس مظاہر نقوی نے سماعت کے دوران کہا کہ تفتیش کی نگرانی کرنا عدالت کا اختیار ہے۔

جسٹس محمد علی مظہر نے ریمارکس دیے کہ آپ کہتے ہیں تو ازخودنوٹس ختم کر دیتے ہیں۔

جسٹس جمال مندوخیل کا کہنا تھا کہ شہید کی والدہ کو لگتا ہے کہ ہم پانچ ججز ان کی مدد نہیں کر سکتے؟ سیدھا سیدھا کہہ دیں کہ سپریم کورٹ کوئی کارروئی ہی نہ کرے۔

جسٹس اعجاز الاحسن نے کہا کہ صحافی برادری کے خدشات اور تحفظ کے لیے ازخودنوٹس لیا گیا تھا، عدالت سوموٹو میں کسی کو سزا دینے نہیں بیٹھی، جے آئی ٹی کے کام میں سپریم کورٹ کوئی مداخلت نہیں کر رہی، عدالت صرف حکومتی اداروں کو سہولیات فراہم کر رہی ہے۔

جسٹس مظاہر نقوی نے سوال کیا کہ اتنا عرصہ کوئی قانونی کارروئی کیوں نہیں کی؟ جس پر وکیل شوکت عزیز صدیقی نے عدالت کو بتایا کہ ایس ایچ او تھانہ رمنا شہید کی والدہ کی درخواست پر مقدمہ درج نہیں کر رہا تھا۔

چیف جسٹس نے کہا کہ عدالت کسی کو تحفظ دینا چاہتی ہے نہ کسی کو مجرم قرار دینا مقصد ہے، کوئی دلچسپی نہیں لے گا تو کارروائی مزید تاخیر کا شکار ہوگی، عدالت نے از خود نوٹس کی کارروئی سے کوئی فائدہ نہیں اٹھانا۔

چیف جسٹس عمر عطا بندیال نے ریمارکس دیے کہ عدالت صحافیوں کا بہت احترام کرتی ہے، صحافی ہمیں کچھ بھی کہیں کبھی توہین عدالت کی کارروئی نہیں کی، صحافی کو قتل کر دیا گیا جو دوسروں کے لیے سبق ہو سکتا ہے۔

مزید کے لیے کلک کریں

ایڈیشنل اٹارنی جنرل نے عدالت کو بتایا کہ باہمی قانونی معاونت کے لیے تین ہفتے درکار ہیں، چیف جسٹس نے ریمارکس دیے کہ تین ہفتوں بعد کیس دوبارہ سنیں گے، اس دوران بیرون ممالک سے باہمی قانونی معاونت سے متعلق پیش رفت ہو تو آگاہ کیا جائے۔

بعد ازاں سپریم کورٹ نے کیس کی سماعت تین ہفتوں کے لیے ملتوی کردی۔

ارشد شریف کا قتل

ارشد شریف اگست میں اپنے خلاف کئی مقدمات درج ہونے کے بعد پاکستان چھوڑ گئے تھے، ابتدائی طور پر وہ متحدہ عرب امارات میں رہے، جس کے بعد وہ کینیا چلے گئے جہاں انہیں قتل کیا گیا تھا۔

ابتدائی طور پر کینیا کے میڈیا نے مقامی پولیس کے حوالے سے کہا کہ ارشد شریف کو پولیس نے غلط شناخت پر گولی مار کر ہلاک کر دیا، بعد میں کینیا کے میڈیا کی رپورٹس نے قتل سے متعلق واقعات کی رپورٹنگ کرتے ہوئے بتایا کہ ارشد شریف کے قتل کے وقت ان کی گاڑی میں سوار شخص نے پیراملٹری جنرل سروس یونٹ کے افسران پر گولی چلائی۔

اس کے بعد حکومت پاکستان نے تحقیقاتی ٹیم تشکیل دی جو قتل کی تحقیقات کے لیے کینیا گئی تھی۔

قتل کے فوری بعد جاری بیان میں کینیا پولیس نے کہا تھا کہ پولیس نے ان کی گاڑی پر رکاوٹ عبور کرنے پر فائرنگ کی، نیشنل پولیس سروس (این پی ایس) نیروبی کے انسپکٹر جنرل کے دفتر سے جاری بیان میں کہا گیا کہ ’50 سالہ پاکستانی شہری ارشد محمد شریف گاڑی نمبر کے ڈی جی 200 ایم پر سوار مگادی، کاجیادو کی حدود میں پولیس کے ایک واقعے میں شدید زخمی ہوگئے تھے‘۔