دنیا کو پاکستان کے بارے میں اپنی رائے بدلنے کی ضرورت ہے، بلاول بھٹو زرداری
وزریر خارجہ بلاول بھٹو زرداری کا کہنا ہے کہ دنیا کو پاکستان کے بارے میں اپنی رائے کو بدلنے کی ضرورت ہے کیونکہ ملک میں دنیا کے لیے بہت زیادہ مواقع موجود ہیں۔
ڈان اخبار میں شائع رپورٹ کے مطابق وزیر خارجہ بلاول بھٹو نے گزشتہ روز (9 دسمبر کو) سنگاپور کی صدر حلیمہ یعقوب اور ہم منصب ڈاکٹر ویوین بالاکرشنن سے ملاقات کی۔
دورے سے قبل سنگاپور کے اخبار ’ڈیلی دی اسٹریٹ ٹائمز‘ کو انٹرویو دیتے ہوئے وزیرخارجہ نے کہا کہ دنیا کو پاکستان کے بارے میں اپنی رائے کو بدلنے کی ضرورت ہے۔
انہوں نے کہا کہ ایک نوجوان سیاسی رہنما کی حیثیت سے مجھے لگتا ہے کہ دنیا کو پاکستان کے عمومی تشخص سے ہٹ کر نئے زاویے سے دیکھنے کی ضرورت ہے۔
انہوں نے بتایا کہ پاکستان میں دنیا کے لیے بہت زیادہ مواقع موجود ہیں، اس سلسلے میں پہلا قدم ملک کے خلاف ٹریول ایڈوائزی کی پابندی کو ختم کرنا ہے، میں سمجھتا ہوں کہ دنیا کو پاکستان کو ایک ابھرتی معیشت کے طور پر دیکھنے کی ضرورت ہے۔
بلاول بھٹو زرداری نے کہا کہ پاکستان اور ایشیائی ممالک میں آن لائن تجارت اور ای کامرس کی سرگرمیاں عروج پر ہیں جس سے آئی ٹی سے متعلق سرگرمیوں اور مالیاتی خدمات میں ہمارے نوجوان بے پناہ فائدہ اٹھا سکتے ہیں۔
انہوں نے کہا کہ بالخصوص تکنیکی اور پیشہ ورانہ تعلیمی شعبے میں پاکستان جنوب مشرقی ایشیا کی ڈیجیٹل معیشت کے ساتھ تعاون اور جنوبی مشرقی ایشیائی ممالک کی ایسوسی ایشن کے ساتھ تعلقات بڑھانے کا خواہاں ہے
بلاول بھٹو نے کہا کہ جنوبی مشرقی ایشیائی ممالک کی ایسوسی ایشن کے کئی حالیہ اقدامات پاکستان کے لیے انتہائی دلچسپی کے حامل ہیں جو میں سمجھتا ہوں کہ پاکستان سمیت تمام ابھرتی ہوئی معیشتوں کے لیے تجارت اور سرمایہ کاری کے بے پناہ مواقع پیدا کریں گے۔
بلاول بھٹو کی سنگاپور کے صدر اور وزیرخارجہ سے ملاقات
دفتر خارجہ کی پریس ریلیز کے مطابق سنگاپور کی صدر حلیمہ یعقوب اور وزیرخارجہ ڈاکٹر ویوین بالاکرشنن سے ملاقات کے دوران بلاول بھٹو نے پاکستان اور سنگاپور کے درمیان تعلقات کو مزید وسعت دینے کی خواہش ظاہر کی۔
صدر حلیمہ یعقوب کے ساتھ ملاقات میں دونوں رہنماﺅں نے پاکستان اور سنگاپور کے دوطرفہ تعلقات کا جائزہ لیا اور دو طرفہ تعلقات اور تعاون کو بڑھانے پر اتفاق کیا۔
سنگاپور کے ہم منصب کے ساتھ علیحدہ ملاقات میں وزیر خارجہ بلاول بھٹو نے دونوں ممالک کے رابطوں کو فروغ دینے کے لیے بات چیت اور اعلیٰ سطح کے دورے کی اہمیت کو اجاگر کیا۔
دنوں رہنماؤں نے معاشی تعاون کے امکانات کو اجاگر کرنے اور زراعت، ڈیجیٹل معیشت اور فنانس کے شعبوں میں تعاون کرنے پر بھی اتفاق کیا۔
اس کے علاوہ علاقائی صورتحال پر بھی تبادلہ خیال کیا گیا اور تعاون کو فروغ دینے کے لیے دونوں ممالک کے درمیان روابط کو برقرار رکھنے پر اتفاق کیا گیا۔
بلاول بھٹو کا فیس بک ہیڈکواٹر کا دورہ
دفتر خارجہ کا کہنا ہے کہ بلاول بھٹو نے سنگاپور میں فیس بُک (میٹا ) کے ایشیا پیسیفک ہیڈکوارٹر کا بھی دورہ کیا۔
اس موقع پر بلاول بھٹو نے فیس بُک کے لیے پاکستان میں مونیٹائزیشن کے اجرا کے لیے اسٹارز پروگرام لانچ کیا، اس اقدام سے نوجوان کاروباری افراد کی استعداد میں اضافہ ہو گا۔
انہوں نے پاکستان میں آئی ٹی کے شعبے کی صلاحیت کو بھی اجاگر کیا اور میٹا اور پاکستان کے درمیان تعاون بڑھانے کی خواہش کا اظہار کیا۔