وفاقی وزیر خزانہ اسحٰق ڈار نے آرمی چیف جنرل قمر جاوید باجوہ کے اہل خانہ کے ٹیکس ریکارڈ کے’ لیک’ ہونے کو غیر قانونی قرار دیتے ہوئے کہا ہے کہ عبوری رپورٹس مل گئی اور اس معاملے کو منطقی انجام تک پہنچائیں گے۔

جیو نیوز کے پروگرام ’کیپٹل ٹاک‘ میں گفتگو کرتے ہوئے اسحٰق ڈار کا کہنا تھا کہ عبوری رپورٹ دیکھی ہے، امید ہے کہ فائنل رپورٹ بھی آج مل جائے گی۔

ان سے پوچھا گیا کہ چیف آف آرمی اسٹاف جنرل قمر جاوید باجوہ کے اہل خانہ کے ٹیکس ریکارڈ لیک ہوا تھا، آپ نے کل انکوائری آرڈر کی تھی، اگر کسی کے ایف بی آر سے ریکارڈ لیک ہو جائے تو کیا یہ غیر قانونی ہے؟

اس سوال کے جواب میں سینیٹر اسحٰق ڈار کا کہنا تھا کہ قانون اس کی اجازت نہیں دیتا ہے کہ عدالتی حکم کے بغیر کسی کے بھی ٹیکس ریکارڈز کو نکالا جائے یا لیک کیا جائے، یہ غیر قانونی ہے۔

وزیر خزانہ نے کہا کہ عبوری رپورٹس سے پتا چلا ہے کہ ایک کا تعلق لاہور اور ایک کا پنڈی سے ہے، ہو سکتا ہے کہ وہ مجاز ہوں کیونکہ راولپنڈی میں سرکل ہے وہاں پر اسسمنٹ ہوتی ہے، ان لوگوں کو اس بات کی اجازت ہوتی ہے۔

انہوں نے کہا کہ اس کو ہم منطقی انجام تک لے کر جائیں گے، غیر قانونی کام کی اجازت دینا یا آنکھیں بند کرنا فرائض کی ادائیگی سے غفلت برتنا ہے۔

خیال رہے کہ گزشتہ روز (21 نومبر) وفاقی وزیر خزانہ اسحٰق ڈار نے چیف آف آرمی اسٹاف جنرل قمر جاوید باجوہ کے اہل خانہ کے ٹیکس ریکارڈ کے ’غیر قانونی لیک‘ ہونے کا نوٹس لیا تھا۔

وزرات خزانہ کی جانب سے یہ بیان تحقیقاتی نیوز ویب سائٹ ’فیکٹ فوکس‘ کی رپورٹ جاری ہونے کے ایک روز بعد سامنے آیا تھا۔

’فیکٹ فوکس‘ کی رپورٹ میں مبینہ طور پر ٹیکس گوشواروں اور ویلتھ اسٹیٹمنٹ کا حوالہ دیتے ہوئے دعویٰ کیا گیا تھا کہ آرمی چیف کے خاندان نے مبینہ طور پر گزشتہ 6 برسوں میں اربوں روپے کمائے۔

مزید کے لیے کلک کریں

بیان میں اس معاملے میں ملوث نامعلوم عہدیداروں کی جانب سے سنگین کوتاہی کے پیش نظر وزیر خزانہ نے وزیر اعظم کے معاون خصوصی برائے ریونیو طارق محمود پاشا کو ہدایت کی تھی کہ وہ خود ٹیکس قانون کی خلاف ورزی کے معاملے کی فوری تحقیقات کریں۔

طارق محمود پاشا کو مزید ہدایت کی گئی تھی کہ فیڈرل بورڈ آف ریونیو (ایف بی آر) کے ڈیٹا کے تحفظ اور رازداری سے متعلق قوانین کی سنگین خلاف ورزی پر ذمہ دار افراد کا تعین کریں اور 24 گھنٹے کے اندر رپورٹ جمع کروائیں۔

’خدا کے لیے معیشت پر سیاست نہ کریں‘

وزیر خزانہ اسحٰق ڈار نے معیشت کے حوالے سے ایک سوال کے جواب میں کہا کہ خدا کے لیے معیشت پر سیاست نہ کریں، سیاسی ایونٹس ضرور کریں لیکن معیشت کے ساتھ جھوٹ پر مبنی نہ کھیلیں، آپ نے چند گرافک بتائے ہیں اور یہ بھی نہیں بتایا کہ اس کی معلومات کہاں سے حاصل کی ہیں۔

ان کا کہنا تھا کہ یہ سب کیا دھرا ان (عمران خان) کی حکومت کا تھا، یہ موج میلہ کرنے آئے تھے، اور چلے گئے، آپ کو تو قوم سے معافی مانگنی چاہیے تھے، آپ نے کہا تھا کہ قرضے کم کروں گا اور ٹیکس بڑھاؤں گا لیکن آپ کیا یہ کرسکے؟

’پیٹرولیم مصنوعات کی قیمتیں آگے جا کر کم کریں گے‘

ان سے سوال پوچھا گیا کہ خام تیل کی قیمتیں 88 ڈالر فی بیرل ہو گئی ہیں کیا پاکستان میں پیٹرولیم مصنوعات سستی ہوں گی؟ اس سوال کے جواب میں ان کا کہنا تھا کہ میں نے آتے کے ساتھ ہی قیتمیں کم کرنے کی کوشش کی، اور قیمتیں کم کی ہیں، اوگرا کی جانب سے متعدد بار سفارشات دی گئی تھیں کہ قیمتوں میں اضافہ کرنا ہے لیکن ہم نے ایسا نہیں کیا۔

ان کا کہنا تھا کہ ملک میں کبھی 30 یا کبھی 35 دن کے ذخائر ہوتے ہیں، انشا اللہ عالمی منڈی میں تیل کی کم قیمتوں کا اثر آگے آئے گا، اوسطاً گزشتہ 15 دن کی لاگت کا حساب لگا کر قیمت کا تعین کیا جاتا ہے، ہم اس سے نفع نہیں لیں گے، ہماری عالمی اداروں سے رابطے کرنے پڑے، جو کچھ ہوگا بہتری کریں، اگر قیمتیں نیچیں آئیں گی تو آگے جا کر قیمتیں کم کریں گے۔

روس سے سستا تیل آنے کے حوالے سے ان کا کہنا تھا کہ اس حوالے سے وزارت پیٹرولیم کو بتا دیا گیا ہے، کوشش ہوگی ان سے سستا تیل لیں، جس طرح وہ پڑوسی ملک کو دے رہے ہیں، جی 7 کمیٹی نے جو کیپ مقرر کی ہے، وہ بھی عالمی منڈی کے مقابلے میں کم ہے، اگر ہمیں بہتر قیمت ملے گی تو پاکستانی عوام کو اس کا فائدہ ہوگا۔