پاکستان کرکٹ بورڈ (پی سی بی) نے آسٹریلیا کے خلاف 3 ٹیسٹ میچز کی سیریز کے لیے قومی اسکواڈ کا اعلان کردیا ہے۔

آسٹریلیا کے خلاف ٹیسٹ سیریز کے لیے 16 کھلاڑیوں اور 5 ریزرو کھلاڑیوں کے ناموں کا اعلان کیاگیا ہے۔

اعلان کردہ قومی ٹیسٹ اسکواڈ میں 3 تبدیلیاں کی گئی ہیں، فاسٹ بولر حارث رؤف اور اوپنر شان مسعود کی ٹیسٹ اسکواڈ میں واپسی ہوئی ہے۔

یہ بھی پڑھیں: آسٹریلوی کرکٹ ٹیم کے دورہ پاکستان کا نیا شیڈول جاری

ان دونوں کھلاڑیوں کو بلال آصف اور عابد علی کی جگہ اسکواڈ میں شامل کیا گیا، جبکہ یاسر شاہ کو ریزرو کھلاڑیوں میں شامل کیا گیا ہے۔

اعلان کردہ 16 رکنی قومی ٹیسٹ اسکواڈ کے کپتان بابراعظم اور نائب کپتان محمد رضوان ہیں۔

دیگر کھلاڑیوں میں عبداللہ شفیق، اظہر علی، فہیم اشرف، فواد عالم اور حارث رؤف شامل حسن علی، امام الحق، محمد نواز، نعمان علی اور ساجد خان بھی اسکواڈ کا حصہ ہیں۔

مزید پڑھیں: آسٹریلیا کا دورۂ پاکستان کیلئے مضبوط ٹیسٹ اسکواڈ کا اعلان

سعود شکیل، شاہین شاہ آفریدی، شان مسعود اور زاہد محمود بھی اسکواڈ میں شامل ہیں۔

اسکواڈ کے ریزرو کھلاڑیوں میں کامران غلام، محمد عباس، نسیم شاہ، سرفراز احمد اور یاسر شاہ شامل ہیں۔

کوچز اور دیگر اسٹاف کا اعلان

پی سی بی نے ثقلین مشتاق کو مزید 12 ماہ کے لیے قومی کرکٹ ٹیم کا ہیڈ کوچ برقرار رکھا ہے۔

اس کے علاوہ شان ٹیٹ 12 ماہ کے لیے قومی کرکٹ ٹیم کے فاسٹ باؤلنگ کوچ مقرر کے گئے ہیں، جبکہ محمد یوسف آسٹریلیا سیریز کے لیے بیٹنگ کوچ ہوں گے۔

یہ بھی پڑھیں: آسٹریلیا کا 1998 کے بعد پہلے دورۂ پاکستان کا اعلان

خیال رہے کہ پاکستان اور آسٹریلیا کے درمیان پہلا ٹیسٹ میچ 4 مارچ کو راولپنڈی میں شروع ہوگا، دوسرا میچ 12 مارچ سے کراچی میں کھیلا جائے گا جبکہ آخری ٹیسٹ کی میزبانی 21 مارچ سے لاہور کرے گا۔

آسٹریلین اسکواڈ

گزشتہ روز آسٹریلیا نے آئندہ ماہ دورۂ پاکستان کے دوران 3 میچز پر مشتمل ٹیسٹ سیریز کے لیے اپنے مضبوط اسکواڈ کا اعلان کردیا تھا۔

فاسٹ باؤلر جوش ہیزل ووڈ کی انجری سے ریکور ہونے بعد ٹیم میں واپسی ہوئی جبکہ آسٹریلیا کی انگلینڈ کے خلاف ایشز سیریز میں 0-4 سے شاندار کامیابی میں نمایاں کارکردگی کا مظاہرہ کرنے والے اسکاٹ بولینڈ نے پیٹ کمنز کی کپتانی میں ٹیم میں اپنی جگہ برقرار رکھی ہے۔

اس پیش رفت سے گزشتہ سال کے اواخر میں انگلینڈ اور نیوزی لینڈ دونوں کے دورہ پاکستان سے پیچھے ہٹنے کے بعد سیکیورٹی مسائل کی وجہ سے سینئر کھلاڑیوں کے دورے سے دستبردار ہونے کے خدشات غلط ثابت ہوگئے ہیں۔

واضح رہے کہ آسٹریلیا کی ٹیم تقریباً 25 سال بعد پاکستان کا دورہ کرے گی اور 2019 کی ایشز سیریز میں انگلینڈ کا سامنا کرنے کے بعد یہ سیریز ٹیسٹ میچز کے لیے پہلا غیر ملکی دورہ ہوگا۔

مزید پڑھیں: آسٹریلیا نے 2022 میں ٹیم پاکستان بھیجنے کا عندیہ دے دیا

1998 کے بعد سے کسی بھی آسٹریلوی ٹیم نے پاکستان کا دورہ نہیں کیا۔

اس دورے کے دوران آسٹریلین ٹیم کی قیادت عبوری کوچ اینڈریو میکڈونلڈ کریں گے۔

دونوں ممالک 3 ایک روزہ میچز اور ایک ٹی ٹوئنٹی میچ بھی کھیلیں گے، اس کے لیے آسٹریلیا کی ٹیم کا علیحدہ سے اعلان کیا جائے گا۔

آسٹریلیا ٹیسٹ اسکواڈ: پیٹ کمنز (کپتان)، ایشٹن ایگر، اسکاٹ بولینڈ، ایلکس کیری، کیمرون گرین، مارکس ہیرس، جوش ہیزل ووڈ، ٹیوس ہیڈ، جوش انگلیس، عثمان خواجہ، مارنس لوباشانے، نیتھن لیون، مچل مارش، مائیکل نیسر، اسٹیو اسمتھ، مچل اسٹارک، مچل سویپسن اور ڈیوڈ وارنر