بھارتی میڈیا نے دعویٰ کیا ہے کہ کترینہ کیف اور وکی کوشل نے اپنی شادی کے نشریاتی و تشہیری حقوق اسٹریمنگ ویب سائٹ کو بھاری رقم کے عوض فروخت کردیے۔

بھارتی اخبار ’مڈ ڈے‘ نے اپنی رپورٹ میں دعویٰ کیا کہ جوڑے نے اپنی شادی کے نشریاتی حقوق فروخت کرنے سے قبل اپنے مہمانوں سے بھی کاغذی قسم نامہ لکھوایا کہ وہ کسی طرح کی ویڈیوز و تصاویر نہیں بنائیں گے۔

رپورٹ کے مطابق دونوں نے شادی کے حقوق ’ایمازون پرائم‘ کو بھارتی 80 کروڑ روپے میں فروخت کیے اور اب اسٹریمنگ ویب سائٹ ہی ان کی شادی کی تصاویر اور ویڈیوز کو نشر اور فروخت کرے گی۔

اس سے قبل بھارتی میڈیا نے مختلف ذرائع سے دعویٰ کیا تھا کہ جوڑے کو ایک اسٹریمنگ ویب سائٹ نے شادی کے نشریاتی حقوق دینے کے لیے ایک 100 کروڑ روپے کی پیش کش کی ہے۔

علاوہ ازیں ’انڈیا ٹوڈے‘ نے اپنی رپورٹ میں بتایا کہ شادی ہونے سے قبل ہی کترینہ کیف اور وکی کوشل نے دو برانڈز کے ساتھ معاہدے کر لیے اور ساتھ ہی اپنا معاوضہ بھی ایک دم بڑھا دیا۔

رپورٹ میں بتایا گیا کہ دونوں نے فٹنیس اور لگژری برانڈ کے ساتھ معاہدے کیے ہیں، جن کے ساتھ وہ اشتہارات میں کام کریں گے۔

رپورٹ کے مطابق دونوں اداکار شادی کے بعد 2022 کے آغاز میں ہی برانڈز کے ساتھ کام کریں گے، تاہم وہ اشتہارات میں پہلے سے کہیں زیادہ معاوضہ وصول کریں گے۔

شادی سے قبل وکی کوشل ایک اشتہار کا معاوضہ ایک کروڑ جب کہ کترینہ کیف ڈیڑھ سے دو کروڑ روپے وصول کرتی تھیں مگر اب دونوں جوڑی کی صورت میں ایک اشتہار کا معاوضہ تین سے پانچ کروڑ روپے وصول کریں گے۔

دونوں کی شادی کی تقریبات 7 دسمبر سے راجستھان کے ’سکس سینز ریزورٹ‘ میں جاری ہیں اور وہ کل تک رشتہ ازدواج میں بندھ جائیں گے۔

تاہم دلچسپ بات یہ ہے کہ دونوں نے خود تاحال شادی سے متعلق کوئی وضاحت یا تردید نہیں کی۔