وفاقی وزیر منصوبہ بندی اسد عمر نے اعلان کیا ہے کہ پاکستان نے ایک روز کے دوران کووِڈ-19 ویکسین کی 10 لاکھ خوراکیں لگانے کا سنگ میل عبور کرلیا۔

ایک ٹوئٹ میں وفاقی وزیر نے کہا کہ 'میں یہ بتاتے ہوئے خوشی محسوس کررہا ہوں کہ ہم نے ایک روز میں 10 لاکھ ویکسینز کا جو ہدف مقرر کیا تھا وہ گزشتہ روز 10 لاکھ 72 ہزار افراد کی ویکسینیشن سے حاصل کرلیا'۔

انہوں نے کہا کہ پنجاب، سندھ، خیبرپختونخوا اور اسلام آباد کے ساتھ تمام وفاقی اکائیاں ریکارڈ نمبر میں ویکسین لگا رہی ہیں، سب کی کارکردگی زبردست ہے'۔

ایک دوسرے ٹوئٹر پیغام میں انہوں نے یہ اعداد و شمار بتائے کہ کون سے بڑے شہروں میں کتنے فیصد آبادی کو ویکسین لگ چکی ہے۔

یہ بھی پڑھیں:پاکستان میں کورونا وائرس کے فعال کیسز کی تعداد 75 ہزار سے متجاوز

انہوں نے بتایا کہ اسلام آباد 10 لاکھ آبادی والا پاکستان کا پہلا شہر بن گیا ہے جہاں 50 فیصد اہل آبادی کو ویکسین کی کم از کم ایک خوراک لگ چکی ہے۔

اسد عمر نے مزید بتایا کہ پشاور اور راولپنڈی میں 35 فیصد، فیصل آباد میں 28 فیصد، لاہور، گوجرانوالہ، سیالکوٹ اور سرگودھا میں 27 فیصد جبکہ کراچی اور حیدرآباد میں بالترتیب 26 اور 25 فیصد افراد کو کورونا ویکسین کی کم از کم ایک خوراک لگ چکی ہے۔

نیشنل کمانڈ اینڈ آپریشن سینٹر (این سی او سی) کے مطابق ملک بھر میں اب تک مجموعی طور پر 3 کروڑ 19 لاکھ 29 ہزار 581 ویکسینز لگائی جاچکی ہیں جن میں سے گزشتہ روز ویکسین کی 110 لاکھ 72 ہزار 342 خوراکیں لگائی گئیں۔

مزید پڑھیں: ملک بھر میں ہفتے میں دو دن چھٹی، کاروبار رات 8 بجے بند کرنے کا اعلان

وزیراعظم کے معاون خصوصی ڈاکٹر فیصل سلطان نے بھی 10 لاکھ ویکسین یومیہ کا سنگ میل عبور ہونے کی تصدیق کی اور اسے ممکن بنانے والے تمام افراد کو مبارکباد دی۔

قبل ازیں اسد عمر نے اتوار کے روز اعلان کیا تھا کہ پاکستان میں 3 کروڑ سے زائد کورونا ویکسینز لگائی جاچکی ہیں۔

انہوں نے بتایا تھا کہ ملک میں ویکسین کی ایک کروڑ خوراکیں لگانے میں 113 دن، 2 کروڑ لگانے میں 28 دن لگے جبکہ مزید صرف 16 دنوں میں ویکسینز کی تعداد 3 کروڑ تک جا پہنچی۔

انہوں نے کہا تھا کہ گزشتہ 6 روز کے دوران ویکسینیشن کے عمل میں تیزی آئی ہے اور اس دوران 50 لاکھ خوراکیں لگائی جاچکی ہیں۔

یہ بھی پڑھیں:ویکسین نہ لگوانے والوں کو 31 اگست تک کی ڈیڈ لائن

خیال رہے کہ پاکستان میں ویکسینیشن کے عمل کا آغاز فروری کے آغاز میں چین کے عطیہ کردہ ویکسینز کے ذریعے ہوا تھا جس میں اولین ترجیح کووِڈ کے خلاف صف اول میں کام کرنے والے ہیلتھ ورکرز کو دی گئی گئی تھی۔

بعدازاں حکومت نے نہ صرف خود ویکسینز خریدی بلکہ عالمی اقدام کوویکس کے ذریعے بھی ملک کو مختلف ویکسینز کی خوراکیں مل چکی ہیں۔

اس دوران پہلے 60 سال سے معمر اور بعدازاں 18 سال تک کی عمر کے شہریوں کی ویکسینیشن کا آغاز کردیا گیا تھا۔

وبا کی چوتھی لہر کے پیشِ نظر این سی او سی نے خبردار کیا تھا کہ تمام شعبہ ہائے زندگی سے تعلق رکھنے والے افراد 31 اگست سے قبل ویکسینیشن کرالیں بصورت دیگر انہیں کام کرنے کی اجازت نہیں ہوگی۔

جس کے بعد ملک بھر کے بالخصوص کراچی کے ویکسینیشن سینٹرز پر عوام کا تانتا بند گیا ہے۔