دورہ نیوزی لینڈ پر انجری کا شکار آل راؤنڈر شاداب خان چھ ہفتوں کے لیے کرکٹ سے دور ہو گئے ہیں اور جنوبی افریقہ کے خلاف سیریز سے بھی باہر ہو گئے ہیں۔

دورہ نیوزی لینڈ کے دوران ٹی20 سیریز میں قومی ٹیم کی قیادت کرنے والے شاداب خان ران کی انجری کا شکار ہوئے اور اسکواڈ کے ترنگا پہنچنے کے بعد ان کی انجری کا ایم آر آئی اسکین کرایا گیا۔

مزید پڑھیں: شاداب انجری کا شکار، نیوزی لینڈ کے خلاف پہلے ٹیسٹ سے باہر

پاکستان کرکٹ بورڈ کی جانب سے جاری اعلامیے کے مطابق شاداب خان کی بائیں ٹانگ کے ریکٹس فیمورس میں بڑے گریڈ کا ٹیئر ہے جس کے بعد انہیں کم از کم 6 ہفتے آرام کا مشورہ دیا ہے۔

پی سی بی کے معالج ڈاکٹر سہیل سلیم کا کہنا ہے کہ ایم آر آئی اسکین میں تشخیص ہوئی ہے کہ شاداب خان کی یہ انجری پرانی نہیں بلکہ نئی ہے۔

واضح رہے کہ اس سے قبل زمبابوے کے خلاف ہوم سیریز میں بھی شاداب خان انجری کی وجہ سے شرکت نہیں کر سکے تھے۔

ڈاکٹر سہیل سلیم نے کہا کہ ہم اس انجری کے حوالے سے احتیاط برتنا چاہتے ہیں لہٰذا انہیں چھ ہفتے کا آرام تجویز کیا ہے، میڈیکل پینل شاداب کی انجری کا جائزہ لیتا رہے گا جس کے بعد ان کی مسابقتی کرکٹ میں واپسی کے حوالے سے کوئی حتمی فیصلہ کیا جائے گا۔

یہ بھی پڑھیں: بابر اعظم نیوزی لینڈ کے خلاف پہلے ٹیسٹ سے باہر، رضوان قیادت کریں گے

انجری کے باوجود شاداب نیوزی لینڈ میں قومی ٹیم کے ہمراہ ہی رہیں گے جہاں پی سی بی کا میڈیکل پینل ان کا ری ہیب پروگرام جاری رکھے ہوئے ہے۔

اس انجری کی وجہ سے شاداب خان نہ صرف نیوزی لینڈ کے خلاف دوسرے ٹیسٹ میچ بلکہ جنوبی افریقہ کے خلاف آئندہ ماہ ہوم سیریز سے بھی باہر ہو گئے ہیں۔پاکستان اور جنوبی افریقہ کے درمیان دو ٹیسٹ اور تین ٹی20 میچوں کی سیریز 26 جنوری سے 14 فروری تک کھیلی جائے گی۔