ملک میں سونے کی فی تولہ قیمت میں ایک بار پھر 1650 روپے کی بڑی کمی دیکھنے میں آئی ہے۔

آل سندھ صراف اینڈ جیولرز ایسوسی ایشن کے مطابق ملک میں 24 قیراط سونے کی فی تولہ قیمت 1650 روپے کمی کے بعد ایک لاکھ 11 ہزار 600 روپے ہوگئی ہے۔

اسی طرح 10 گرام سونا 1414 روپے سستا ہوکر 95 ہزار 680 روپے کا ہوگیا ہے۔

مقامی مارکیٹوں میں سونے کی قیمت میں نمایاں کمی کی وجہ عالمی مارکیٹ میں سونے کی قیمت میں واضح کمی ہے جہاں فی اونس سونا 22 ڈالر کم ہو کر 1872 ڈالر ہوگیا۔

یہ بھی پڑھیں: پاکستان میں فی تولہ سونے کی قیمت میں نمایاں کمی

واضح رہے کہ چند ماہ قبل عالمی مارکیٹ میں فی اونس سونے کی قیمت 2 ہزار ڈالر سے تجاوز کر گئی تھی جس کا اثر مقامی مارکیٹ میں بھی نظر آیا۔

پاکستان میں اگست 2020 کے پہلے ہفتے میں سونے کی فی تولہ قیمت ایک لاکھ 32 ہزار روپے کی بلند ترین سطح تک پہنچ گئی تھی۔

ماہرین نے چین اور بھارت کی جانب سے سونے کی بڑھتی ہوئی خریداری، امریکا اور چین کے درمیان کشیدگی میں اضافے سے اہم کرنسیوں کی قدر میں کمی، سونے میں سرمایہ کاری بڑھنے اور کورونا وائرس کے باعث پیدا ہونے والے معاشی بحران کو مقامی اور بین الاقوامی مارکیٹوں میں سونے کی قیمتوں میں اس قدر اضافے کی وجہ قرار دیا تھا۔