ترکی کے سرکاری نشریاتی ادارے ترکش ریڈیو اینڈ ٹیلی وژن کارپوریشن (ٹی آر ٹی) نے پاکستان میں اپنے ڈراموں کی حد سے زیادہ مقبولیت کو دیکھتے ہوئے خصوصی طور پر پاکستانی مداحوں کے لیے یوٹیوب چینل متعارف کرادیا۔

ٹی آر ٹی نے یوٹیوب چینل پاکستان میں اپنے شہرہ آفاق ڈرامے ارطغرل غازی کی حد سے زیادہ مقبولیت کے بعد متعارف کرایا۔

ارطغرل غازی کو ٹی آر ٹی اور پاکستان ٹیلی وژن (پی ٹی وی) کے درمیان خصوصی معاہدے کے تحت وزیر اعظم عمران خان کی ہدایات پر سرکاری ٹی وی پر نشر کیا جا رہا ہے۔

ارطغرل غازی کو اپریل کے آخر سے پی ٹی وی پر اردو زبان میں ترجمہ کرکے نشر کیا جا رہا ہے اور مذکورہ ڈراما پاکستان میں یوٹیوب پر سب سے زیادہ دیکھا جانے والے ڈراما بھی بن چکا ہے۔

ارطغرل غازی کی کہانی 13 ویں صدی سے قبل کے ترک جنگجو بہادر ارطغرل غازی کی صلیبی قبیلوں سے جنگوں پر مبنی ہے، جنہیں اسلامی فتوحاٹ بھی کہا جاتا ہے۔

ارطغرل غازی کی شاندار مقبولیت کے بعد ٹی آر ٹی نے پاکستانی مداحوں میں ترکی کے ڈراموں کی مقبولیت کو دیکھتے ہوئے یوٹیوب پر خصوصی چینل متعارف کرادیا، جس میں مقبول ڈراموں کو اردو سب ٹائیٹلز کے ساتھ اپ لوڈ کیا جا رہا ہے۔

ٹی آر ٹی کی جانب سے جون کے وسط میں متعارف کرائے گئے (ٹی آر ٹی ڈراما) نامی یوٹیوب چینل کو ایک ہفتے میں 22 ہزار کے قریب افراد نے سبسکرائب کرلیا اور اس پر اب تک ترکی کے 2 ڈراموں کی 10 اقساط کو ریلیز کیا جا چکا ہے۔

اب تک ٹی آر ٹی ڈراما پر مقبول ڈرامے (پایہ تحت عبدالحمید) کی 8 قسطیں اور (الیمی براکما) کی 2 قسطوں کو اردو سب ٹائیٹلز کے ساتھ جاری کیا جا چکا ہے۔

یوٹیوب پر جاری کیے گئے ڈراموں کی قسطوں کو اوسط 5 ہزار بار دیکھا جا چکا ہے جب کہ چینل پر جاری کی گئی پہلی ویڈیو کو اب تک 77 ہزار سے زائد بار دیکھا جا چکا ہے۔