پاکستان پیپلز پارٹی کے چیئرمین بلاول بھٹو زرداری نے عوام سے کورونا وائرس اور پی آئی اے طیارہ حادثے کے پیش نظر سادگی سے عید منانے کی اپیل کی ہے۔

بلاول نے کہا کہ دنیا بھر کے مسلمان ایک ایسے وقت میں عید منارہے ہیں جب کرونا کی خطرناک وباء پھیلی ہوئی ہے جبکہ حال ہی میں طیارہ حادثہ بھی ہوا ہے لہٰذا ہم اپیل کرتے ہیں کہ عوام اس سال عید سادگی سے منائیں.

انہوں نے کہا کہ اپنا تحفظ کرکے نہ صرف ہم اپنی بلکہ دوسروں کی جان بھی بچاسکتے ہیں بلکہ ایسا کرنے سے ہمارے نظامِ صحت پر اتنا ہی بوجھ آئے گا کہ جتنا وہ اٹھاسکے.

بلاول کا کہنا تھا کہ سعودی عرب، ایران، متحدہ عرب امارات اور ترکی نے اپنے شہریوں کو عید کی نماز کی گھر پر ادائیگی اور عید کا دن گھروں پر منانے کا پابند کیا ہے.

انہوں نے کہا کہ میں اپیل کرتا ہوں کہ یہ عید اپنے ڈاکٹروں، نرسوں، ہیروز اور اپنے شہداء کے نام کریں.