ایران نے کورونا وائرس کے باعث عائد پابندیوں کو نرم کرتے ہوئے کاروبار، مذہبی اور ثقافتی مقامات کھولنے کا فیصلہ کیا ہے۔

اس حوالے سے ایرانی صدر حسن روحانی نے کہا کہ عجائب گھر اور تاریخی مقامات کو اتوار کو عیدالفطر کی تقریبات کے ساتھ دوبارہ کھول دیا جائے گا۔

ساتھ ہی انہوں نے بتایا کہ مقدس مقامات کو پیر سے دوبارہ کھولا جائے گا۔

برطانوی خبررساں ادارے رائٹرز کے مطابق حسن روحانی نے گزشتہ ہفتے کہا تھا کہ مزارات کو صبح 3 گھنٹے اور دوپہر میں 3 گھنٹے کے لیے کھولا جائے گا، تاہم مزارات کے کچھ مقامات جیسے تنگ گزرگاہوں کو بند رکھا جائے گا۔

مزید برآں ملک میں تمام کارکنان آئندہ ہفتے سے اپنے کام پر واپس جائیں گے۔