اسلام آباد: کورونا وائرس کے بارے میں وزیر خارجہ شاہ محمود قریشی نے اپنے ملائیشین اور سنگاپور کے ہم منصبوں کو فون کرکے وبا کے پھیلنے سے پیدا ہونے والے چیلنجز سے نمٹنے کے لیے قریبی تعاون کی ضرورت پر زور دیا۔

ڈان اخبار کی رپورٹ کے مطابق ملائشیا کے وزیر خارجہ ہشام الدین حسین سے گفتگو میں شاہ محمود قریشی نے انہیں وزیر اعظم عمران خان کے قرضوں سے نجات اور تنظیم نو کی تجویز کے بارے میں آگاہ کیا تاکہ ترقی پزیر ممالک کو انسانی جانوں کو بچانے اور ان کی معیشتوں کو مدد کرنے کے قابل بنایا جاسکے۔

سنگاپور کے وزیر خارجہ ڈاکٹر ویوین بالا کرشنن کے ساتھ گفتگو میں وزیر خارجہ نے وائرس کی منتقلی کا سلسلہ ختم کرننے کے لیے رابطے کی نشاندہی کرنے والی ایپلی کیشن ’ٹریس ٹوگیدھر’ (مل کر پتہ لگائیں) میں پاکستان کی دلچسپی کا اظہار کیا۔