گوگل نے اپنے نئے فون کا ڈیزائن اور قیمت خود لیک کردی
بیشتر کمپنیاں اپنے نئے اسمارٹ فونز کو متعارف کرائے جانے تک چھپانے کی کوشش کرتی ہیں مگر گوگل اس معاملے میں سب سے الگ ہے۔
درحقیقت اکثر گوگل اپنے پکسل فونز کی تفصیلات خود ہی لیک کردیتا ہے، اب چاہے وہ غلطی سے ہو یا دانستہ طور پر۔
گوگل پکسل 3 اور پکسل 4 کی تاریک رونمائی گوگل نے باضابطہ اعلان سے پہلے لیک کی تھی اور اس سال بھی نئے سستے پکسل 4 اے کی تصدیق خود ہی کردی ہے۔
درحقیقت گوگل نے اس نئے فون کے ڈیزائن اور قیمت کو فون متعارف کرائے جانے سے پہلے ظاہر کردیا۔
اس فون کے رینڈرز تو چند ماہ پہلے پھیلنا شروع ہوئے تھے اور ان سے عندیہ ملتا تھا کہ یہ اس میں پہلی بار گوگل کی جانب سے پنچ ہول سیلفی کیمرا دے کر آل اسکرین ڈسپلے دیا جارہا ہے۔
مگر ان رینڈرز کو چھوڑیں کمپنی نے تو فون کو پیش کرنے سے قبل ہی اس کا اشتہاری بورڈ لگادیا۔
یہ فون ممکنہ طور پر مئی میں متعارف کرائے جانے کا امکان ہے مگر پکسل 4 اے کی اشتہاری مہم لگتا ہے کہ ابھی سے شروع ہوچکی ہے۔
اسمارٹ فونز کی لیکس کے حوالے سے معروف ٹوئٹر صارف ایون بلاس نے پکسل 4 اے کے اشتہارات کی مختلف تصاویر ٹوئٹس کیں، جن سے اس فون کے فرنٹ اور بیک ڈیزائن کی تصدیق ہوتی ہے۔
اور فرنٹ پر پنچ ہول ڈسپلے دیکھا جاسکتا ہے جبکہ بیک پر سنگل کیمرا لینس ہوگا۔
یہاں تک کہ بل بورڈ پر فون کی قیمت بھی درج ہے یعنی اس کی قیمت 399 ڈالرز سے شروع ہوگی جو کہ ممکنہ طور پر 64 جی بی اسٹوریج والا ورژن ہوسکتا ہے۔
واضح رہے کہ گوگل پکسل اسمارٹ فون سیریز کو خالص اینڈرائیڈ آپریٹنگ سسٹم اور کیمرا سسٹم کی وجہ سے بہترین سمجھا جاتا ہے۔
گوگل کے یہ فون فلیگ شپ ڈیوائسز میں شامل ہیں جن کی قیمت اکثر اتنی زیادہ ہوتی ہے کہ بیشتر افراد خرید نہیں پاتے اور اسی کو دیکھتے ہوئے گزشتہ سال کمپنی نے ان کے سستے ورژن پکسل 3 اے کی شکل میں متعارف کرائے تھے۔
اس فون کو بھی متعارف کرائے جانے سے قبل گوگل نے اپنی ویب سائٹ پر اس کی تصدیق کی تھی۔