اسلام آباد: ملک بھر میں ڈینگی کے پھیلاؤ نے ایک مرتبہ بھر نیا ریکارڈ قائم کردیا اور رواں برس کے دوران اب تک 49 ہزار 5 سو 87 افراد اس سے متاثر ہوئے ہیں جبکہ دو ہفتے سے بھی کم وقت میں 5 ہزار سے زائد کیسز سامنے آئے ہیں۔

ڈان اخبار کی رپورٹ کے مطابق اس سے قبل ملک میں ڈینگی کے سب سے زیادہ کیسز 8 برس قبل رپورٹ کیے گئے تھے اور 2011 میں 27 ہزار افراد ڈینگی سے متاثر ہوئے تھے۔

تاہم اُس وقت ڈینگی کے نتیجے میں 370 افراد جان کی بازی ہار گئے تھے، یہ تعداد رواں برس ہونے والی 79 اموات سے 4 گنا زیادہ تھیں۔

ڈینگی کے کیسز میں اضافے کی بڑی وجوہات بتاتے ہوئے وزارت صحت کے ترجمان ساجد شاہ نے بتایا کہ 'رواں برس دنیا بھر میں ڈینگی کے کیسز کی غیر معمولی تعداد رپورٹ ہوئی ہے'۔

مزید پڑھیں: پاکستان میں ڈینگی کے پھیلاؤ نے نیا ریکارڈ قائم کردیا

انہوں نے کہا کہ 'ملک بھر میں ڈینگی کے کیسز ریکارڈ کرنے کے طریقہ کار میں بہتری آئی ہے'۔

بات کو جاری رکھتے ہوئے انہوں نے دعویٰ کیا کہ دنیا بھر میں ڈینگی کی غیر معمولی تعداد کے مقابلے میں پاکستان کی کارکردگی دیگر ممالک سے بہتر ہے۔

دوسری جانب ڈان کے پاس موجود دستاویز کے مطابق رواں سال کے دوران ملک بھر میں ڈینگی کے 49 ہزار 5 سو 87 کیسز کی تصدیق ہوئی، جس میں سب سے زیادہ 13 ہزار ایک سو 79 کیسز وفاقی دارالحکومت اسلام آباد میں رپورٹ ہوئے۔

سندھ میں ڈینگی کے تصدیق شدہ کیسز کی تعداد 13 ہزار 2 سو 51، پنجاب میں 9 ہزار 8 سو 55، خیبرپختونخوا میں 7 ہزار 7 سو 76 اور بلوچستان میں 3 ہزار 2 سو 17ہے۔

علاوہ آزاد کشمیر سے ایک ہزار 6 سو 90 کیسز رپورٹ ہوئے جبکہ 6 سو 25 کیسز کو 'دیگر' کیٹیگری میں رکھا گیا ہے۔

یہ بھی پڑھیں: ملک بھر میں ڈینگی کے 25 ہزار سے زائد کیسز کی تصدیق

'دیگر' کیٹیگری ان کیسز کی نشاندہی کرتی ہے جن کا اصل مقام معلوم نہیں ہوسکا۔

اسی طرح ڈینگی سے خیبرپختونخوا اور گلگت بلتستان میں کوئی اموات رپورٹ نہیں ہوئیں جبکہ وفاقی دارالحکومت اسلام آباد میں 22 افراد جاں بحق ہوئے۔

علاوہ ازیں ڈینگی سے سب سے زیادہ اموات سندھ میں ہوئیں جن کی تعداد 33 ہے، اس کے بعد پنجاب میں 22, بلوچستان میں 3 جبکہ آزاد کشمیر میں ڈینگی کے باعث ایک شخص جاں بحق ہوا۔