راولپنڈی: پولیس نے جمعیت علمائے اسلام (ف) کی آزادی مارچ میں شریک شرکا کی فہرست مرتب کرلی۔

علاوہ ازیں انتطامیہ نے جے یو آئی کی ذیلی تنظیم انصار السلام کے زیر استعمال گاڑیوں اور انہیں مالی معاونت فراہم کرنے والوں کی بھی فہرست تیار کرلی۔

اس ضمن میں تمام متعلقہ ایس ایچ اوز کو پرفارمہ فراہم کیا گیا اور ہدایت کی گئی کہ ان کے علاقے سے گزرنے والے اپوزیشن کے قافلوں سے متعلق تفصیلات فراہم کی جائیں۔

پولیس کے مطابق گجر خان، منڈرا اور راوت کے راستے راولپنڈی پولیس کی حدود میں گزرنے والی گاڑیاں کم از کم ایک ہزار 200 سے زائد تھیں جن پر 28 سے 30 ہزار افراد سوار تھے۔

مزید پڑھیں: فوج ایک غیر جانب دار اور قومی ادارہ ہے، میجر جنرل آصف غفور

گاڑیوں میں ٹرک، کاریں، جیپ اور موٹرسائیکل شامل ہیں۔

پولیس کے مطابق کسی بھی ناشگوار واقعہ سے نمٹنے کے لیے 4 ہزار اہلکار اور رینجرز کی 3 کمپنیاں تعینات کی گئی۔

اس ضمن میں سی پی او محمد فیصل رانا نے پولیس افسران سے خطاب میں کہا کہ ’پولیس الرٹ ہے، شہریوں کی جان و املاک کو نقصان پہنچانے نہیں دیا جائےگا‘۔