کیا کریں ہم سے مودی جی کا دُکھ دیکھا نہیں جارہا۔ بے چارے کیسے آس لگائے اس خلائی مشن کے کمانڈ سینٹر میں بیٹھے تھے، بالکل ویسے ہی جیسے ابھی نندن کو پاکستان کی سمت روانہ کرکے انتظار کررہے تھے کہ وہ ابھی گیا ابھی آیا تباہی پھیلا کر۔

نندن تو گِرگرا کے واپس آگیا تھا، لیکن ’وکرم‘ اتنا گرا ہے کہ واپسی کے قابل ہی نہیں رہا۔ خلا میں چاند کے آس پاس بھی کوئی پاکستان ہوتا تو شاید ابھی نندن کی طرح گرے پڑے وکرم کو عزت کے ساتھ شام تَلک واپس بھیج دیتا، اور بھارت میں وکرم کو بھی تِلک لگائے اور ہار پہنائے جارہے ہوتے۔

ہم سوچ رہے ہیں مودی جی کی آس بار بار کیوں ٹوٹتی ہے، جس طرح ان کی ماتا جی سوچتی ہوں گی ’میرا بچہ ایسا کیوں ہے؟‘، ماتا جی کو معلوم نہیں اپنے سوال کا جواب ملا یا نہیں، ہمیں تو بہت غور کرنے کے بعد مل گیا۔ دراصل غیر شادی شدہ ہونے کی وجہ سے مودی جی کی کوئی ساس نہیں، اس لیے آس ان سے ساس والا سلوک کرتی ہے۔

آس کا یہ ساسی سلوک اپنی جگہ لیکن خلائی مشن کی ناکامی کی ایک اور وجہ بھی ممکن ہے، حیرت ہے کہ اتنے سامنے کی بات مودی صاحب کی نظروں میں کیوں نہ آسکی، شاید اس لیے کہ وہ اب تک آس پاس دیکھنے کے بجائے خلاؤں میں جھانک رہے ہیں، آنکھیں نیچی کریں اور سیما پار نظر ڈالیں تو انہیں وہاں پاکستان کا پرچم لہراتا نظر آئے گا۔ اس پرچم پر بنا چاند صاف صاف بتارہا ہے کہ پاکستان اور چاند کے بیچ کوئی سمبندھ ہے۔

پس تو مودی سرکار کو جھٹ پٹ بلکہ ’فَٹ دھنی سے‘ یہ الزام لگادینا چاہیے کہ ‘چاند اور پاکستان کے مابین بڑا یارانہ لگتا ہے۔ ہمیں یقین ہے کہ چاند کٹر مسلمان ہے، جبھی تو پورا سال عیدیں منواکر اور مہینے شروع کرواکر مسلمانوں کی خدمت میں مصروف رہتا ہے۔ خاص طور پر چین کی طرح پاکستان کا یہ پکا آڑی ہے۔ اسی وجہ سے پاکستان کے کہنے پر چاند نے ہمارا خلائی مشن ناکام کردیا۔ جوں ہی ہماری چاند گاڑی چاند کے قریب پہنچی اور بس کَنّوں کا فاصلہ رہ گیا تھا کہ چاند ’اوئی اللہ، کوئی دیکھ لے گا‘ کہہ کر دوڑ گیا اور وکرم میاں اپنی جھونک میں آگے نکلتے چلے گئے اور کسی بلیک ہول میں جاگھسے۔‘