دنیا بھر میں یعنی یورپ، امریکا، پاکستان، جنوبی امریکا اور ایشیا سمیت دیگر ممالک میں صارفین کو فیس بک کے استعمال میں مشکلات کا سامنا ہے۔

دوسری جانب فیس بک کی زیرملکیت میسجنگ اپلیکشن واٹس ایپ میں بھی صارفین مختلف مقامات پر تصاویر، ویڈیوز اور وائس پیغامات بھیجنے سے قاصر ہیں، تاہم ٹیکسٹ پیغامات سینڈ ہورہے ہیں۔

انسٹاگرام صارفین کو بھی اسی طرح کے مسائل کا سامنا ہے جس میں صارفین تصاویر پوسٹ کرنے سے قاصر ہیں بلکہ اکثر کے پاس وہ ایپ یا سائٹ ہی لوڈ نہیں ہورہی۔

ابھی یہ واضح نہیں کہ آخر فیس بک اور اس کی ایپس کو اس مسئلے کا سامنا کس وجہ سے ہے تاہم یہ رواں سال کے دوران تیسری بار ہے جب فیس بک کو بڑے پیمانے پر سائٹ کی بندش کا سامنا ہوا ہے۔

اس سے پہلے مارچ میں ایسا سروس کنفگریشن چینج کی بدولت ہوا جس کے ایک ماہ بعد فیس بک، انسٹاگرام اور واٹس ایپ کو ایک بار پھر اس تجربے کا سامنا ہوا اور اب ایک سال میں تیسری بار ایسا ہو رہا ہے۔

فیس بک نے اس حوالے سے کہا ہے کہ وہ صارفین کو پیش آنے والے مسائل سے آگاہ ہے اور ان کو جلد از جلد دور کرنے کے لیے کام کیا جارہا ہے۔

خیال رہے کہ فیس بک میں اس طرح کے مسائل متعدد ایپس کو متاثر کرتے ہیں جو اس سے جڑی ہوتی ہیں جبکہ دنیا بھر میں اربوں صارفین اس سے متاثر ہوتے ہیں، جو ان ایپس پر انحصار کرتے ہیں، خصوصاً معلومات کی ترسیل بہت مشکل ہوجاتی ہے۔