پاکستان کرکٹ ٹیم کے ہیڈ کوچ مکی آرتھر نے مقامی کھلاڑیوں کو پاکستان سپر لیگ (پی ایس ایل) میں بہترین کارکردگی دکھانے پر ورلڈ کپ 2019 کے لیے منتخب کرنے کا عندیہ دے دیا۔

ڈان اخبار کی رپورٹ کے مطابق مکی آرتھر نے کہا کہ پی ایس ایل میں اچھی کارکردگی دکھانے پر کھلاڑیوں کو ورلڈ کپ کا ٹکٹ مل سکتا ہے۔

ان کا کہنا تھا کہ ‘پی ایس ایل نے ماضی میں باصلاحیت کھلاڑیوں کو متعارف کروایا ہے اور مجھے اس سیزن میں بھی مزید کی امید ہے’۔

مکی آرتھر کا کہنا تھا کہ ‘مجھے یقین ہے کہ ہم ایک اور نام حاصل کرپائیں گے جن کو ٹیم میں شامل کرسکیں، اگر ان مقابلوں میں کوئی کھلاڑی واقعی بہتر کارکردگی دکھاتا ہے تو ہوسکتا ہے اس کو ہم کارآمد بنائیں، ٹورنامنٹ بہت اچھا ہے جہاں سے ہمیں ہر دفعہ کوئی ایک کھلاڑی مل جاتا ہے’۔

یہ بھی پڑھیں: ورلڈ کپ کی تیاریوں میں دیگر ٹیموں سے آگے ہیں، آرتھر

خیال رہے کہ مکی آرتھر خود پی ایس ایل کی ٹیم کراچی کنگز کی کوچنگ کررہے ہیں اور ان کا ماننا ہے کہ ٹورنامنٹ میں کھلاڑیوں کو اپنی بہتر کارکردگی دکھانے کا موقع ملتا ہے۔

مزید پڑھیں: ‘صبر کریں، بہت جلد پی ایس ایل پاکستان میں ہو گا‘

مکی آرتھر نے کہا کہ ‘مجھے امید ہے کہ ٹرافی ہم جیتیں گے لیکن دیگر پانچ دیگر ٹیمیں بھی موجود ہیں تو ہم دیکھیں گے اور ہم اپنے میچ کے روز اپنی طرف سے بہترین کارکردگی دکھائیں گے’۔

خیال رہے کہ پی ایس ایل کے چوتھے سیزن کا آغاز 14 فروری کو متحدہ عرب امارات میں رنگارنگ تقریب کے بعد ہوگا اور پہلے میچ میں دفاعی چمپیئن اسلام آباد یونائیٹڈ اور لاہور قلندرز آمنے سامنے ہوں گے۔

اسلام آباد یونائیٹڈ نے دو مرتبہ اور پشاور زلمی نے ایک مرتبہ چمپیئن بننے کا اعزاز حاصل کیا تھا جبکہ لاہور قلندرز اور کراچی کنگز کی ٹیمیں ناقص کارکردگی کا مظاہرہ کرتے ہوئے پہلے ہی راؤنڈ میں باہر ہوگئی تھیں۔

پی ایس ایل میں ابتدائی طور پر 5 ٹیمیں شامل تھیں تاہم گزشتہ برس ملتان سلطانز کے نام سے ایک ٹیم کا اضافہ کیا گیا تھا اور رواں سیزن میں سابق کپتان شعیب ملک اس کی قیادت کریں گے اور مشہور آل راؤنڈر شاہد آفریدی بھی اس ٹیم کا حصہ ہیں۔