کپل شرما وہ نام ہے، جن کے پرستار صرف بھارت میں ہی نہیں بلکہ پاکستان میں بھی لاکھوں کی تعداد میں ہیں، مگر لگتا ہے کہ 2017 اور 18 میں سامنے آنے والی مشکلات نے ان کی شخصیت کو بری طرح متاثر کیا، مگر اب وہ ایک بار پھر نئے جذبے کے ساتھ چھوٹی اسکرین کا رخ کررہے ہیں۔

گزشتہ ہفتے وہ اپنی قریبی ساتھی گنی چتراتھ کے ساتھ رشتہ ازدواج سے منسلک ہوئے اور اب ان کا کپل شرما شو ایک بار پھر بھارت کے سونی ٹی وی میں لوٹ رہا ہے۔

یہ شو 29 دسمبر سے شروع ہورہا ہے اور اس کے افتتاحی شو کا پہلا ٹیزر بھی سامنے آگیا ہے، جس کو دیکھ کر لگتا ہے کہ معروف کامیڈین ماضی کی مشکلات بھلا کر نئے سفر کے لیے تیار ہیں۔

مزید پڑھیں : کیرئیر میں زوال کے بعد کپل شرما کا حال خراب

اس شو کی افتتاحی قسط میں فلم سمبا کے مرکزی اداکار رنویر سنگھ اور سارہ علی خان کے ساتھ ڈائریکٹر روہت شیٹھی شریک ہوں گے۔

اس ٹیزر ویڈیو میں ککو شردا کو کپل شرما کی ٹیلیویژن سے دوری کی 'وجہ' بتاتے ہوئے دیکھا جاسکتا ہے۔

کپل اور ککو کی مزاحیہ تکرار معروف کامیڈین کے اچھے دنوں کی یاد دلاتی ہے۔

اس سے پہلے بھی اس شو کا ایک ٹیزر سامنے آیا تھا جس میں سلمان خان، ارباز خان، سہیل خان، سلیم خان ، رنویر سنگھ اور سارہ علی خان کو بے ساختہ قہقہے لگاتے ہوئے دکھایا گیا تھا مگر اس میں شو کے آغاز کی تاریخ نہیں بتائی گئی تھی۔

ابھی یہ دیکھنا ہوگا کہ یہ شو مداحوں کی توقعات پر کس حد تک پورا اترتا ہے کیونکہ ایک بار شو بند ہونے کے بعد جب دوبارہ شروع کیا گیا تو کپل شرما کی بیماری اور دیگر وجوہات کی بناءپر اسے دوبارہ بند کرنا پڑا تھا۔

خیال رہے کہ رواں سال جون میں کپل شرما کی ایسی تصاویر سامنے آئی تھیں جس نے ان کے مداحوں کو پریشان کردیا تھا۔

کپل شرما اس وقت تک ٹی وی اسکرین پر حکمرانی کرتے رہے، جب تک ان کے ساتھی کامیڈین سنیل گروور سے ایک پرواز کے دوران لڑائی نہیں ہوگئی۔

یہ بھی پڑھیں : کپل شرما اور سنیل گروور کے درمیان جہاز میں ہوا کیا؟

مختلف رپورٹس کے بعد کیرئیر میں آنے والی مشکلات، ڈپریشن، الکحل کی لت اور غیر پیشہ ورانہ رویے نے ان کی شخصیت کو بری طرح متاثر کیا۔

جنوری 2017 میں سنیل گروور سے لڑائی کے بعد ان کا زوال شروع ہوا اور پہلے ان کا شو کپل شرما شو بند ہوا، جس کے بعد انہوں نے خرابی صحت کی بناءپر وقفہ بھی لیا۔