مختصر لباس میں پرفارمنس سے آزادی کا احساس ہوتا ہے، کترینہ

خوش ہوں کہ لوگ مجھے انتہائی پرکشش اور بولڈ سمجھتے اور کہتے ہیں، اداکارہ

بولی وڈ بار بی ڈول کترینہ کیف کو ہندی زبان عبور نہ ہونے پر ابتداء میں کافی تنقید کا نشانہ بنایا گیا اور اب تک انہیں اس پر عبور حاصل نہ ہونے پر کبھی کبھی طعنے دیے جاتے ہیں۔

تاہم کترینہ کیف نے ابتدا سے ہی سخت محنت اور یکسانیت سے خود کو ایک سپر اسٹار کے طور منوایا ہے۔

انہوں نے نہ صرف اداکاری اور ہندی زبان پر عبور حاصل کیا، بلکہ وہ ایک بہترین ڈانسر کے طور پر بھی ابھر کر سامنے آئیں۔

اگرچہ بولی وڈ میں آئٹم گرلز کا خطاب سنی لیونی، ملائیکا اروڑا اور ملائیکا شراوٹ جیسی اداکاروں کو دیا گیا، تاہم کترینہ کیف بھی ان اداکاراؤں میں شامل ہیں، جنہوں نے ایک سے بڑھ کر ایک ڈانس نمبر گانا دیا۔

’شیلا کی جوانی، چکنی چمیلی، عشق شوا، کملی، ثریا اور اب حسن پرچم‘ سمیت دیگر گانے دینے والی کترینہ کیف کو آئٹم سانگس کرنے اور ان میں قدرے مختصر لباس پہن کر پرفارمنس کرنے پر کوئی حرج نہیں، بلکہ وہ ایسے گانوں میں پرفارمنس کو اپنا اعزاز سمجھتی ہیں۔

یہ بھی پڑھیں: ڈانس فلم میں کترینہ کیف کا معاوضہ ہیرو سے بھی کم

کترینہ کیف کا خیال ہے کہ وہ اس طرح کے گانوں میں پرفارمنس دینے اور فلموں میں بولڈ کردار ادا کرنے کے بعد اگرچہ شہوت انگیز لگتی ہوں گی، تاہم انہیں اچھا لگتا ہے کہ لوگ انہیں انتہائی پرکشش اور بولڈ کہتے اور سمجھتے ہیں۔

حال ہی میں ان کا ریلیز ہونے والا گانا ’حسن پرچم‘ بھی مداحوں میں بے حد مقبول گیا ہے، اس میں بھی وہ ماضی کے دیگر گانوں کی طرح نیم عریاں لباس میں بولڈ ڈانس کرتی دکھائی دیں۔

دکن کیرونیکل کے مطابق فلموں میں مختصر لباس پہن کر پرفارمنس کرنے اور لوگوں کی جانب سے بولڈ سمجھے جانے پر کترینہ کیف نے خوشی کا اظہار کیا اور کہا کہ انہیں یہ سن کر اچھا لگتا ہے کہ مداح انہیں پرکشش سمجھتے ہیں۔

کترینہ کیف فلم زیرو جلد ہی ریلیز کی جائے گی—اسکرین شاٹ

اداکارہ نے وضاحت کی کہ نیم عریاں لباس پر بولڈ پرفارمنس دینے پر انہیں خود مختاری کا احساس ہوتا ہے۔

انہوں نے اس خیال کو بھی مسترد کردیا کہ لباس، میک اپ اور ادائیں کوئی معنیٰ نہیں رکھتیں، اہم بات یہ ہے کہ آپ خود کو کس طرح پر سکون اور با اعتماد سمجھتے ہیں۔

مزید پڑھیں: کترینہ کی چھوٹی بہن کا بھی بہن کی طرح ڈانسر بننے کا فیصلہ

کترینہ کیف کے مطابق مختصر لباس پہن کر گانوں اور فلموں میں پرفارمنس کرنے سے ان کا اعتماد بڑھتا ہے اور وہ اپنی شخصیت کے لیے اچھا محسوس کرتی ہیں۔

خیال رہے کہ کترینہ کیف نے اب تک ایک درجن سے زائد آئٹم گانوں میں پرفارمنس کی ہے، ان کا سب سے زیادہ دیکھا جانے والا ڈانس نمبر دھوم تھری کا کملی ہے۔