پنجاب میں خواتین پر تشدد اور ان کے قتل کے واقعات میں تشویشناک حد تک اضافہ سامنے آیا ہے اور ایسے ہی ایک واقعے میں خانیوال کے علاقے میں قتل کی جانے والی ماں اور ان کی کم عمر بیٹی کو خودکشی کا رنگ دینے کی کوشش کی گئی۔

پولیس کے مطابق حویلی کورنگا میں 30 سالہ ماں آمنہ بی بی اور 4 سالہ بیٹی منزہ بی بی کو گلہ دبا کر قتل کیا گیا۔

ان کا کہنا تھا کہ قتل کے واقعے کے بعد خودکشی کا رنگ دینے کے لیے دونوں کو درخت سے لٹکایا گیا۔

مزید پڑھیں: لاہور میں ماں اور 2 بیٹیوں کا قتل

پولیس کے مطابق مقتولہ کا اپنے خاوند اور میکے والوں سے تنازع چل رہا تھا۔

پولیس تھانہ حویلی کورنگا نے دونوں مقتولین کی لاشوں کو پوسٹ مارٹم کے لیے تحصیل ہیڈ کوارٹر ہسپتال کبیر والا بھیج دیا ہے۔

اس سے قبل یہ رپورٹ سامنے آئی تھی پنجاب کے دارالحکومت لاہور میں ماں اور 2 بیٹوں کو قتل کیا گیا جبکہ ایک زخمی بیٹی کی حالت تشویشناک بتائی گئی۔

اس واقعے کے حوالے سے میڈیا رپورٹس میں بتایا گیا تھا کہ ان ماں بیٹیوں کو مبینہ طور پر غیرت کے نام پر قتل کیا گیا تاہم پولیس کا کہنا تھا کہ تفتیش سے قبل اس حوالے سے کہنا قبل از وقت ہوگا۔