بولی وڈ کی آنے والی سائنس فکشن فلم ‘ایکوامین’ کا یوں تو پہلا ٹریلر رواں ماہ جولائی میں ریلیز کیا گیا تھا، جس میں سمندروں کے بادشاہ آرتھر کری یعنی ‘ایکوامین’ کو زمینی شیطانوں سے لڑتے دکھایا گیا تھا۔

تاہم اب اس فلم کا ایکسٹینڈ ٹریلر بھی جاری کردیا گیا، جس میں نہ صرف ایکوامین بلکہ ان کی اہلیہ شہزادی میرا یعنی امبر ہارڈ کو بھی شیطانوں سے الجھتے اور ان سے لڑتے ہوئے دکھایا گیا ہے۔

اگرچہ پہلے ٹریلر سے ہی فلم کی کہانی کو سمجھنا مشکل تھا، تاہم نئے ٹریلر کو دیکھ کر اندازہ ہوتا ہے کہ فلم میں شائقین کی خواہشات کے عین مطابق متعدد ایسے مناظر ہوں گے، جو فلمی شائقین کو اپنے سحر میں جکڑ لیں گے۔

ایکسٹینڈ ٹریلر کو دیکھ کر فلمی شائقین کی توقعات مزید بڑھ جاتی ہیں اور فلم کی الجھتی کہانی کو سمجھنا مزید مشکل بن جاتا ہے۔

یہ بھی پڑھیں: زمین کے شیطانوں سے لڑتا سمندروں کا بادشاہ ‘ایکوامین’

نئے ٹریلر میں جہاں ایکوامین کو عام روپ میں دکھایا گیا ہے، وہیں ان کی اہلیہ میرا کو بھی ان کے ساتھ عام روپ میں دکھایا گیا ہے، تاہم ساتھ ہی انہیں غیر معمولی صلاحیتوں کی مالک شخصیات کے طور پر دکھایا گیا ہے۔

ٹریلر میں ایکوامین اور میرا شیطانی مخلوق سے الجھتے اور لڑتے نظر آتے ہیں۔

ٹریلر میں سمندر میں ہونے والی جنگ کو اس طرح دکھایا گیا ہے، جیسے یہ زیر سمندر نہیں بلکہ زمین پر ہو رہی ہو۔

خیال رہے کہ فلم کی کہانی اینٹلانٹس نامی سمندری بادشاہت پر مبنی ہے، جس کی ایکوامین بادشاہ ہوتے ہیں۔

فلم میں اینٹلانٹس میں متعدد بادشاہتیں دکھائی جائیں گی، اس بادشاہت پر اس وقت برا وقت آتا ہے، جب زمینی شیطان وہاں جاتے ہیں اور پھر ایکوامین اپنی اہلیہ میرا یعنی امبر ہارڈ سمیت ان طاقتوں سے لڑنے کے لیے اٹھ کھڑے ہوتے ہیں۔

ڈی سی کامک کے کردار ایکوامین پر بننے والی یہ پہلی فلم ہے، اس سے قبل اسی کردار کو 2016 کی فلم ‘ڈان آف جسٹس’ اور 2017 کی فلم ‘جسٹس لیگ’ میں پیش کیا گیا تھا۔

ایکوامین کا کردار جیسن میموا نے ادا کیا ہے، جو اس سے قبل بھی یہی کردار ادا کرتے نظر آئے تھے۔

فلم میں جیسن میموا کے علاوہ نکولو کڈمین، امبر ہارڈ، ولیم ڈفوئے، پیٹرک ولسن اور یحیٰ عبدالمتین کے علاوہ دیگر اداکار شامل ہیں۔

فلم میں نکولو کڈمین نے جیسن مموا کی والدہ اور سمندروں پر مبنی ریاست کی شہزادی جب کہ امبر ہارڈ سمندروں کی ریاست میں موجود ایک جنگجو قبیلے کے سردار کی بیٹی کا کردار ادا کیا ہے، جو بعد میں ایکوامین کی دلہن بنتی ہیں۔

ڈائریکٹر جیمز وان کی اس فلم کو رواں برس 21 دسمبر کو ریلیز کیا جائے گا۔