پاکستان تحریک انصاف (پی ٹی آئی) کے چیئرمین عمران خان کے ملک کے 22ویں وزیر اعظم منتخب ہونے کے بعد ملک کے مختلف حصوں میں پی ٹی آئی کارکنان نے خوب جشن منایا۔

عمران خان کے وزیر اعظم منتخب ہونے پر کراچی میں تحریک انصاف کے مرکز انصاف ہاؤس میں جشن منایا گیا اور مٹھائیاں تقسیم کی گئیں۔

چیئرمین تحریک انصاف کے وزیر اعظم منتخب ہونے پر کارکنوں کی بڑی تعداد انصاف ہاؤس پہنچی جہاں ایک دوسرے کو مبارکبادیں دی گئیں۔

پشاور سیمت خیبر پختونخوا کے مختلف اضلاع میں عمران خان کی وزیر اعظم پاکستان منتخب ہونے پر جشن کا سماں دیکھنے میں آیا اور کارکنوں نے ایک دوسرے میں مٹھائیاں بھی تقسیم کیں۔

لاہور اور کوئٹہ سمیت پنجاب اور بلوچستان کے مختلف اضلاع میں بھی عمران خان کے وزیر اعظم منتخب ہونے پر جشن منایا گیا اور ڈھول کی تھاپ پر بھنگڑے ڈالے گئے۔