پاکستان کے سب سے بڑے صوبے پنجاب میں رواں ماہ 25 جولائی کو ہونے والے عام انتخابات کے دوران 141 حلقوں میں مجموعی طور پر 44 سے زائد خواتین میدان میں اتریں گی۔

پنجاب میں جنرل نشست پر انتخاب لڑنے والی 44 سے زائد خواتین میں سے ملتان سے قومی اسمبلی کے حلقے این اے 155 کی امیدوار نوشین افشاں بلوچ بھی ہیں۔

نوشین افشاں بلوچ جو پیشے کے لحاظ سے وکیل ہیں، انہیں یہ اعزاز حاصل ہے کہ وہ پنجاب سے عوامی نیشنل پارٹی (اے این پی) کی جنرل نشست پر رکن اسمبلی کی پہلی اور واحد خاتون امیدوار ہیں۔

ملک کے ایک انتہائی اہم حلقے میں مردوں کے مقابلے جنرل نشست پر کھڑی ہونے والی نوشین بلوچ کی خاص بات یہ ہے کہ وہ اپنی انتخابی مہم چلانے کے لیے اپنی محدود ٹیم کے ساتھ حلقے کے ہر گھر میں جاکر لوگوں سے ووٹ مانگتی دکھائی دیتی ہیں۔