لولی وڈ فیملی فلم ’کیک‘ نے لندن میں ہونے والے20 ویں یوکے ایشین فلم فیسٹیول میں بہترین ڈائریکٹر کا ایوارڈ اپنے نام کرلیا۔

خیال رہے کہ ’یو کے ایشین‘ فلم فیسٹیول کا آغاز رواں ماہ 14 مارچ سے ہوا، میلے کے دوران ’کیک‘ کی خصوصی اسکریننگ بھی کی گئی۔

’کیک‘ کا عالمی پریمیئر بھی لندن میں کیا گیا، جب کہ فلم کی کاسٹ نے خصوصی طور پر ’یوکے ایشن فلم فیسٹیول‘ میں شرکت کی۔

فلم فیسٹیول میں پاکستانی فلم ’ورنہ‘ کی خصوصی نمائش بھی کی گئی، جب کہ فلم کی مرکزی اداکارہ ماہرہ خان کو بھی میلے کے دوران ایوارڈ سے نوازا گیا تھا۔

اب اسی فلم فیسٹیول میں ’کیک‘ کے ذریعے ہدایت کاری کے کیریئر کی شروعات کرنے والے ڈائریکٹر عاصم عباسی کو بہترین ڈائریکٹر کا ایوارڈ دیا گیا۔

یہ بھی پڑھیں: ’پاکستان میں کیک جیسی فلم نہیں بنی‘

عاصم عباسی نے فلم کو بہترین ڈائریکٹر کی کیٹیگری کا ایوارڈ ملنے پر ٹوئٹر پر خوشی کا اظہار کیا۔

عاصم عباسی کو ملنے والا ایوارڈ برطانوی نشریاتی ادارے کی صحافی آتیکا چوہدری نے وصول کیا، جنہوں نے بھی ٹوئیٹ کے ذریعے فلم کے ڈائریکٹر اور دیگر ٹیم کو مبارکباد پیش کی۔

خیال رہے کہ ’کیک‘ کے ذریعے ماڈل اور اداکار عدنان ملک نے فلم ڈیبیو کیا، جب کہ عاصم عباسی نے اس کے ذریعے ڈائریکٹوریل ڈیبیو کیا۔

اپنی فلم ڈیبیو کے حوالے سے عدنان ملک ڈان سے گفتگو میں پہلے کہ چکے ہیں کہ ’میں پیسوں اور مشہور ہونے کے لیے فلموں میں کام نہیں کرتا، مجھے نہیں لگتا اب تک پاکستان میں کیک جیسی فلم بنائی گئی ہے، یہ ایک جذباتی فلم ہے اور میرا کردار شائقین کو سرپرائز کردے گا‘۔

مزید پڑھیں: 'کیک': کے ذریعے عدنان ملک کا ڈیبیو

فلم کی دیگر کاسٹ میں صنم سعید، محمد احمد، فارس خالد، بیو ظفر، حرا حسین اور آمنہ شیخ شامل ہیں۔

فلم کی کہانی ایک خاندان کے گرد گھومتی ہے، جو کئی چھوٹے چھوٹے تنازعات میں گھرا نظر آتا ہے، تاہم فلم میں شامل جذباتی، کامیڈی اور رومانوی مناظر کی وجہ سے اس فلم کو دیگر فلموں سے منفرد کہا جا رہا ہے۔

فلم کو رواں ماہ 30 مارچ کو پاکستان میں ریلیز کیا جائے گا، فلم کی ٹیم اس کی تشہیر کے لیے مختلف یونیورسٹیز، شہروں اور ٹی وی چینلز کے مارننگ شوز میں شرکت کرنے میں مصروف ہے۔