جنوبی کورین کمپنی ایل جی نے اپنے فلیگ شپ فون وی 30 کا نیا ورژن ایس تھن کیو متعارف کرا دیا ہے۔

کمپنی کی جانب سے یہ فون بارسلونا میں موبائل ورلڈ کانگریس کے آغاز سے قبل متعارف کرایا گیا ہے۔

اس اپ گریڈ فون میں اسٹوریج اور ریم کے ساتھ ساتھ کلر آپشن اور آرٹی فیشل انٹیلی جنس (اے آئی) کا اضافہ کیا گیا ہے۔

مزید پڑھیں : دنیا کے سب سے بڑے موبائل فون شو میں کیا کچھ سامنے آئے گا؟

توقعات کے مطابق ایل جی نے وی 30 ایس تھن کیوں میں اے آئی پر خصوصی توجہ دی ہے، خصوصاً کیمرے کے لیے۔

اے آئی کیمرہ میں مشین لرننگ ٹیکنالوجی خودکار طور پر آٹھ مختلف موڈز جیسے پورٹریٹ، فوڈ، لینڈ اسکیپ، سٹی اور فلاور وغیرہ کی شناخت کے لیے استعمال کیا گیا ہے۔

اسی طرح انتہائی کم روشنی میں تصاویر لینے کے لیے نیا برائٹ موڈ بھی متعارف کرایا گیا ہے جس کے بارے میں کمپنی کا دعویٰ ہے کہ یہ ماضی کے مقابلے میں دوگنا زیادہ بہتر تصاویر لینے میں مدد دیتا ہے۔

اسی طرح ایل جی کیو لینس ایک اور اے آئی فیچر ہے جس سے صارفین مختلف ویب سائٹ پر مصنوعات کو تلاش کرسکتے ہیں۔

یہ بھی پڑھیں : ایل جی کا سب سے 'بہترین' اسمارٹ فون وی 30

دلچسپ بات یہ ہے کہ یہ تمام فیچرز اوریجنل وی 30 میں بھی ایک سافٹ وئیر اپ ڈیٹ کے ذریعے متعارف کرائے جانے کا امکان ہے۔

جہاں تک دیگر فیچرز کی بات ہے تو اس فون میں سکس انچ کی کواڈ ایچ ڈی پلس او ایل ای ڈی اسکرین (18:9 ریشو کے ساتھ) دی گئی ہے، اسنیپ ڈراگون 835 پراسیسر، سولہ میگا پکسل اور تیرہ میگا پکسل کا ڈوئل رئیر کیمرہ سیٹ اپ، پانچ میگا پکسل کا فرنٹ کیمرہ، اینڈرائیڈ اوریو آپریٹنگ سسٹم اور 3300 ایم اے ایچ بیٹری ہے، جو کہ پرانے وی 30 میں بھی موجود ہیں۔

فرق بس فور جی بی کی بجائے سکس جی بی ریم کی موجودگی ہے جبکہ اسٹوریج کو 64 جی سے بڑھا کر 128 سے 256 جی بی کردیا گیا ہے۔

کمپنی نے فی الحال اس فون کی قیمت اور دستیابی کی تاریخ کا کوئی اعلان نہیں کیا ہے۔