مری کے علاقے ملکوٹ میں گاڑی کھائی میں گرنے سے ایک ہی خاندان کے 6 افراد جاں بحق ہوگئے۔

پولیس عہدیدار قاسم جدون کا کہنا تھا کہ حادثے میں جاں بحق ہونے والے افراد میں تین کم عمر لڑکیوں کے علاوہ ان کے والد اور دادا شامل ہیں۔

قاسم جدون نے کہا کہ حادثہ ایبٹ آباد سے شمال کی جانب سے 160 کلومیٹر دور پیش آیا۔

مقامی افراد نے اپنی مدد آپ کے تحت گھنٹوں کی کوششوں کے بعد لاشوں اور زخمیوں کو کھائی سے نکالا۔

ابتدائی رپورٹس کے مطابق 5 افراد موقع پر ہی جاں بحق ہوگئے تھے جبکہ ڈرائیور کو شدید زخمی حالت میں ہسپتال منتقل کردیا گیا جہاں وہ زخموں کی تاب نہ لاتے ہوئے دم توڑ گئے۔

خیال رہے کہ اس علاقے میں سڑکوں کی خراب صورت حال، حفاظتی اقدامات کی عدم موجودگی اور ٹریفک قوانین پر عمل درآمد نہ ہونے کے باعث اکثر حادثات پیش آتے ہیں۔