کیمبرج یونیورسٹی نے اسٹیفن ہاکنگ کے ڈاکٹریٹ کے تھیسس کو آن لائن کردیا جس کے فوری بعد لوگوں کی بڑی تعداد نے اسے پڑھنے کے لیے ویب سائٹ کا رخ کیا اور ویب سائٹ آن لائن ٹریفک کنٹرول نہیں کر پائی اور کریش کر گئی۔

خیال رہے کہ معروف سائنسدان اسٹیفن ہاکنگ نے اپنے تھیسس 1966 میں صرف 24 سال کی عمر میں مکمل کیے تھے۔

یہ بھی پڑھیں: 'انسانوں کو سو سال میں زمین سے نکل جانا چاہئے'

کائنات کی توسیع کی خصوصیات پر لکھے گئے اسٹیفن ہاکنگ کے تھیسس میں کائنات کی تخلیق کے خیالات کا تصور پیش کیا گیا تھا جو سائنسدانوں میں بے حد مقبول ہوئے۔

غیر ملکی خبر رساں ادارے ایسوسی ایٹڈ پریس (اے پی) کی رپورٹ کے مطابق یونیورسٹی ذرائع کا کہنا تھا کہ اسٹیفن ہاکنگ کے تھیسس کی آن لائن بہت زیادہ مانگ دیکھی جارہی تھی جسے دیکھتے ہوئے پیر کے روز یونیورسٹی نے اسے ویب سائٹ پر مفت ڈاؤن لوڈ کے لیے پیش کیا گیا، جس کے بعد اس کو پڑھنے والوں کی بڑی تعداد کی وجہ سے ویب سائٹ لوڈ برداشت نہیں کرسکی اور لوگوں کی یونیورسٹی کی ویب سائٹ تک رسائی بالکل نا ممکن ہوگئی۔

اس حوالے سے معروف سائنسدان اسٹیفن ہاکنگ کا کہنا تھا کہ ان کے تھیسس کی آن لائن رسائی کافی لوگوں کو آسمان کی طرف دیکھنے اور نظام کائنات کو سمجھنے کے لیے آسانی پیدا کر سکتی ہے۔