بولی وڈ کی خوبرو اداکارہ شردھا کپور ویسے تو ان دنوں اپنے آنے والی فلم ’حسینہ پارکر‘ کی ریلیز ہونے کا انتظار کر رہی ہیں، جو رواں ماہ 22 ستمبر کو نمائش کے لیے پیش کی جائے گی۔

تاہم دوسری جانب شردھا کپور بیڈمنٹن کھیلتے ہوئے بھی نظر آ رہی ہیں۔

شردھا کپور کی فلم ’حسینہ پارکر‘ کا گانا ’بنٹی‘ 9 ستمبر کو جاری کیا گیا، جسے اب تک لاکھوں افراد دیکھ چکے۔

حسینہ پارکر میں شردھا کپور انڈر ورلڈ ڈان داؤد ابراہیم کی بہن کا کردار ادا کرتی نظر آئیں گی، تاہم وہ اپنے آنے والی ایک اور فلم ’سائنا‘ میں بیڈمنٹن اسٹار کے روپ میں نظر آئیں گی۔

یہ بھی پڑھیں: بڑی فلموں سے شکست کا ڈر’حسینہ پارکر‘ کی نمائش مؤخر

جی ہاں شردھا کپور اگلی فلم میں بھارتی بیڈمنٹن اسٹار ’سائنا نہال‘ کا کردار ادا کرتی نظر آئیں گی۔

فلم کی کہانی سائنا نہال کی جدوجہد، زندگی، مشکلات اور کامیابیوں کے ارد گرد گھومتی نظر آئے گی۔

فلم کو ’ٹی سیریز‘ کے بینر تلے ریلیز کیا جائے گا، فلم کو بشن کمار پروڈیوس کریں گے، جب کہ اس کی ہدایات امول گپتے دیں گے، جو اس سے قبل بھی کئی کامیاب فلموں کی ہدایات دے چکے ہیں۔

مزید پڑھیں: داؤد ابراہیم کی فیملی کو دیکھ کر شردھا 'پریشان'

شردھا کپور نے بیڈمنٹن پریکٹس کی تصاویر اپنے انسٹاگرام اکاؤنٹ پر شیئر کیں، جن میں وہ سائنا نہال کے ساتھ بیڈمنٹن کھیلتی نظر آ رہی ہیں۔

بیڈمنٹن پریکٹس کی تصاویر سائنا نہال نے بھی اپنے ٹوئٹر اکاؤنٹ پر شیئر کیں۔

اطلاعات کے مطابق ’سائنا‘ کی شوٹنگ رواں برس کے آخر میں شروع کی جائے گی، جب کہ فلم کی ٹیم نے اس کی ریلیز کی تاریخ کا اعلان نہیں کیا۔

یہ بھی پڑھیں: شردھا کپور باہو بلی ہیرو کی ہیروئن بنیں گی

خیال رہے کہ رواں ماہ 22 ستمبر کو ریلیز ہونے والے شردھا کپور کی فلم ’حسینہ پارکر‘کی نمائش اس سے قبل 4 بار مؤخر کی جاچکی ہے۔

فلم کی ٹیم کے مطابق بڑی فلموں کے ریلیز ہونے کی وجہ سے ’حسینہ پارکر‘ کی نمائش 4 بار مؤخر کی گئی۔