دنیا میں ایک دوسرے سے مشابہ رکھنے والے افراد تو متعدد بار مشکلات کا شکار ہوتے ہی ہیں، تاہم وہ افراد بھی اس صورتحال سے دو چار ہوتے ہیں، جن کے نام یکساں ہوتے ہیں۔

ایسا ہی کچھ پاکستانی نژاد باکسرعامر خان کے ساتھ بھی ہوتا رہا، لوگ انہیں بولی وڈ سپر اسٹار عامر خان سمجھ بیٹھتے ہیں۔

پاکستانی نژاد باکسر عامر خان ان دنوں اپنے ایک ہفتے کے دورے پر ہندوستان میں موجود ہیں، وہاں انہوں نے بھارتی میڈیا سے گفتگو کے دران کہا کہ انہیں سیکڑوں لوگ دنگل ہیرو سمجھ بیٹھتے ہیں۔

ہندوستان ٹائمز نے اپنی رپورٹ میں بتایا کہ پاکستانی نژاد باکسر کا کہنا تھا کہ لوگ انہیں فیس بک اور ٹوئٹر پر بھارتی فلم اسٹار عامر خان سمجھ کر پیغامات بھیجھتے رہتے ہیں، یہاں تک کچھ مداح انہیں مسٹر پرفیکشنسٹ سمجھ کر فون تک کرتے ہیں۔

یہ بھی پڑھیں: باکسر عامر خان کی نازیبا ویڈیو لیک

باکسر کا کہنا تھا کہ ان دونوں کے ناموں کی وجہ سے مداح کنفیوژن کا شکار ہیں، یہ صرف اور صرف ’عامر خان‘ نام کی وجہ سے ہو رہا ہے۔

پاکستانی نژاد برطانوی باکسر نے امید ظاہر کرتے ہوئے کہا کہ انہیں یقین ہے کہ ان کے مداح بھی پی کے ہیرو کو باکسر عامر خان سمجھ کر سوشل میڈیا پر پیغامات بھجواتے ہوں گے۔

باکسر نے اس امید کا اظہار بھی کیا کہ بولی وڈ سپر اسٹار عامر خان ایک دن ان کی زندگی پر بننے والی فلم میں ان کا کردار ادا کریں گے۔

پاکستانی نژاد باکسر کا کہنا تھا کہ بولی وڈ میں عامر خان ان کی زندگی پر بننے والی فلم میں ان کا کردار ادا کرنے کے لیے موزوں انتخاب ہوں گے، اور اگر عامر خان ان کی زندگی کے اوپر فلم بنائیں تو مسٹر پرفیکٹ سے بڑھ کر اور کوئی ان کا کردار ادا نہیں کرسکتا۔

مزید پڑھیں: عامر خان کی داتا دربار پر حاضری

خیال رہے کہ باکسر عامر خان برطانیہ میں پیدا ہوئے، وہیں پلے بڑھے، مگر ان کے خاندان کا تعلق پاکستان سے ہے، وہ متعدد بار پاکستان کے دورے کر چکے ہیں۔

عامر خان نے اپنے 30 سالہ کیریئر میں باکسنگ فائٹ کے 33 مقابلے لڑے، جس میں سے وہ 31 میں ناقابل شکست رہے۔

بھارتی دورے کے دوران صحافیوں کے ایک سوال کے جواب میں انہوں نے کہا کہ وہ جب گھر جاتے ہیں تو ان کی 3 سالہ بیٹی لیمائش ان کے چہرے پر حریف کھلاڑی کے پنچ لگنے کی وجہ سے پڑنے والے نشانات یا زخم کو دیکھ کر ان سے سوالات کرتی ہیں کہ ’ڈیدڈی یہ کیا ہوگیا‘؟۔

یہ بھی پڑھیں: باکسر عامر خان کی بیوی سسرال کے مظالم کا شکار

عامر خان کے مطابق وہ اپنی بچی کو عمر کے اس حصے میں سچ نہیں بتانا چاہتے کہ وہ باکسنگ فائیٹر ہیں، اس لیے ان سے جھوٹ بولتے ہیں کہ گاڑی کا دروازہ لگ گیا، یا خود ان کی غلطی کی وجہ سے انہیں زخم رسا، جس پر ان کی بچی ان کے چہرے پر کریم لگاتی ہیں۔

انہوں نے کہا کہ وہ بڑے ہونے پر اپنی بچی کو سب کچھ بتادیں گے، اور ساتھ ہی اسے باکسنگ کی تربیت بھی دیں گے۔