کراچی میں تعینات سوئس قونصل جنرل فلپ کروزیئر کا کہنا ہے کہ سوئٹزرلینڈ حکومت چاہتی ہے کہ اس کی کمپنیاں پاک-چین اقتصادی راہداری (سی پیک) میں ملنے والے مواقع سے فائدہ اٹھائے جو دوطرفہ تجارت اور کاروبار کی بہتری کے لیے معاون ہوگا۔

فلپ کروزیئر سوئٹزرلینڈ کے قونصل جنرل اور سوئس بزنس کونسل آف پاکستان کی جانب سے سی پیک میں بیرونی سرمایہ کاروں کے لیے مواقع کے حوالے سے ایک تعارفی پروگرام کے بعد کراچی میں ایک پریس کانفرنس کررہے تھے۔

کروزیئر کا کہنا تھا کہ نیٹ ورک کے قیام، خیالات کے تبادلے اور سی پیک کے ذریعے پاکستان میں سرمایہ کاری کے لیے دستیاب مواقعوں کے حوالے سے اسی طرح کا ایک اجلاس حال ہی میں اسلام آباد میں ہوا تھا۔

ان کا کہنا تھا کہ 'اکثر غیر ملکی سرمایہ کار سی پیک کو صرف چین اور پاکستان کا مشترکہ منصوبہ تصور کیے ہوئے ہیں تاہم جس طرح منصوبے کو وسعت دی گئی ہے، دیگر ممالک کو راہداری کا حصہ بننے کے لیے کئی کاروباری مواقع پیدا ہورہے ہیں'۔

دوسری جانب سوئس بزنس کونسل آف پاکستان کے صدر فرحت علی کا کہنا تھا کہ سی پیک کاروبار کے لیے بہترین مواقع فراہم کرے گا۔

یہ رپورٹ 28 اپریل 2017 کو ڈان اخبار میں شائع ہوئی