پاکستان پیپلز پارٹی نے سندھ میں پانی اور توانائی کے بحران پر وفاقی حکومت کے خلاف احتجاج کا سلسلہ شروع کردیا۔

کراچی بدین لنک روڈ پر پیپلز پارٹی کے دھرنے سے خطاب کرتے ہوئے سینیئر رکن اسمبلی نثار کھوڑو نے کہا کہ 'سندھ کا پانی لاہور میں بیٹھے حکمرانوں کی ایماء پر چوری کیا جارہا ہے'۔

نثار کھوڑو کا مزید کہنا تھا کہ سندھ کو قدرتی وسائل بشمول گیس کے جائز حق سے محروم رکھا جارہا ہے جبکہ صوبے کی زراعت تباہ ہوچکی ہے۔

یہ بھی پڑھیں: سندھ میں پانی کی قلت پر صوبائی اراکین کی تشویش

انہوں نے کہا کہ 'سندھ کے عوام کو توانائی کے بدترین بحران کا سامنا ہے اور ہم حکمرانوں کو صوبے کا پانی چرانے کی اجازت نہیں دیں گے'۔

نثار کھوڑو نے مطالبہ کیا کہ سابق صدر آصف علی زرداری کے قریبی ساتھیوں کو عدالت میں پیش کیا جائے، اس طرح کی چالوں سے پیپلز پارٹی کا راستہ نہیں روکا جاسکتا۔

وزیراعظم نواز شریف کا حوالہ دیتے ہوئے نثار کھوڑو نے کہا کہ وہ صرف ان اسکیموں میں دلچسپی لیتے ہیں جن سے ان کے بزنس پارٹنرز کو فائدہ ہوتا ہے جبکہ انہیں ملک کے حقیقی مسائل کا کوئی احساس نہیں۔

مزید پڑھیں: زرداری کے ساتھی 'لاپتہ'، اپوزیشن لیڈر کی تشویش

ضلع جیکب آباد کے لیے وزیراعظم کے اعلان کردہ ایک ارب روپے کے پیکج کے حوالے سے نثار کھوڑو نے کہا کہ 'وزیراعظم سندھ میں عوام کی توجہ حاصل کرنے میں ناکام رہے اور اب وہ صوبے جعلی پیکجز کا اعلان کررہے ہیں'۔

انہوں نے دعویٰ کیا کہ بے نظیر بھٹو کے قتل کے بعد آصف زرداری نے ملک کو بچایا۔