لاہور کے علاقے لالازار میں جانوروں کے ڈاکٹر 68 سالہ اشفاق احمد کو فائرنگ کرکے قتل کردیا گیا۔

رپورٹس کے مطابق احمدی برادری سے تعلق رکھنے والے ڈاکٹر اشفاق اپنے بھتیجے کو لے کر جارہے تھے کہ راستے میں موٹر سائیکل شخص نے انہیں روک کر فائرنگ کردی، جس کے نتیجے میں ڈاکٹر اشفاق موقع پر ہی ہلاک ہوگئے۔

حملے میں ڈاکٹر اشفاق کے بھتیجے شاہزیب کو کوئی چوٹ نہیں آئی، جبکہ حملہ آور جائے وقوع سے فرار ہوگیا۔

ڈاکٹر اشفاق احمد لاہور یونیورسٹی آف ویٹرنٹی اینڈ اینیمل سائنسز کے ریٹائرڈ پروفیسر تھے اور انہوں نے فوڈ اینڈ نیوٹریشن میں پی ایچ ڈی کر رکھا تھا۔

پولیس کا کہنا تھا کہ ’ابھی یہ کہنا قبل از وقت ہوگا کہ واقعہ ٹارگٹ کلنگ کا تھا یا ذاتی دشمنی کا نتیجہ تھا۔‘

تاہم انجمن احمدیہ پاکستان کے ترجمان سلیم الدین نے واقعے کی مذمت کرتے ہوئے کہا کہ ڈاکٹر اشفاق کو احمدی ہونے کی وجہ سے نشانہ بنایا گیا۔