راولپنڈی : روس کے ڈپٹی چیف آف جنرل اسٹاف کرنل جرنل اسراکوف سرگی یوریوچ کی قیادت میں روسی فوجی وفد نے شمالی و جنوبی وزیرستان کا دورہ کیا۔

پاک فوج کے شبعہ تعلقات عامہ آئی ایس پی آر کی جانب سے جاری بیان کے مطابق روسی فوجی وفد نے جمعرات کو شمالی وزیرستان کے علاقے میران شاہ اور جنوبی وزیرستان کے علاقے وانا کا دورہ کیا۔

ڈی جی آئی ایس پی آر کے مطابق روسی وفد کو فاٹا میں دہشت گردوں کے خلاف بلا امتیاز آپریشن سے متعلق تفصیلی بریفنگ دی گئی۔

ڈی جی آئی ایس پی آر کے مطابق روسی وفد کو پاک افغان بارڈر منیجمنٹ اور ترقیاتی منصوبوں کے حوالے سے بھی آگاہ کیا گیا۔

یہ بھی پڑھیں: تاریخ میں پہلی بار روسی فوج کی پاکستان آمد

وفد کو فاٹا میں امن و استحکام کے حوالے سے کی جانے والی کوششوں سے بھی آگاہ کیا گیا۔

روسی فوجی وفد نے فاٹا سے دہشت گردی اور انتہا پسندی کے خاتمے کے لیے پاک فوج کی کوششوں کو سراہا۔

دورے کے دوران کورکمانڈر پشاور لیفٹیننٹ جنرل نذیر احمد بٹ بھی روسی وفد کے ہمراہ تھے ۔

خیال رہے کہ گزشتہ برس ستمبر میں پاکستان کی تاریخ میں پہلی بار مشترکہ جنگی مشقوں میں حصہ لینے کے لیے روس کے فوجی راولپنڈی پہنچے تھے۔

دونوں ممالک میں دفاعی تعاون بڑھانے کا باقاعدہ سلسلہ 2014 میں اس وقت شروع ہوا تھا، جب روس کے وزیر دفاع سرگئی شوئے گو نے پاکستان کا دورہ کیا تھا، اسی دورے میں ماسکو اور اسلام آباد نے دفاعی معاہدے پر دستخط کیے تھے۔