رواں برس پاکستان میں کئی رومانوی اور کامیڈی فلمیں بنائی جارہی ہیں، جن میں سے ایک آنے والی فلم 'مان جاؤ نا' بھی ہے۔

عابس رضا کی ہدایات میں بننے والی فلم 'مان جاؤ نا' دوستوں کی مشکلات پر مبنی ایک فلم ہے جو یونیورسٹی کی زندگی سے باہر آنے کے بعد کئی مسائل کا سامنا کرتے ہیں۔

اس فلم کی پروڈکشن محمد خالد علی کررہے ہیں جس کی کہانی عاصمہ نبیل اور احسن رضا نے لکھی، فلم میں عدیل چوہدری، حاجرہ یامین، عاصمہ عباس، غنا علی اور عاصم رضا میر اہم کردار کرتے نظر آئیں گے۔

اور اب اس فلم کی کاسٹ میں ایاز سموں کا نام بھی شامل کرلیا گیا ہے۔

فلم 'مور' میں کام کرنے والے ایاز سموں نے ڈان امیجز سے بات کرتے ہوئے اس فلم کی تفصیلات بتائیں۔

اپنے کردار کے حوالے سے ان کا کہنا تھا 'میرے کردار کا نام عاصم ہے، وہ ایک مزاحیہ لڑکا ہے اور فلم میں اس کے سنجیدہ ہونے کی کہانی کو پیش کیا جائے گا، جیسے کوئی وقت اور عمر کے ساتھ سمجھ دار ہوتا چلا جاتا ہے'۔

انہوں نے مزید کہا کہ فلم میں جذباتی لمحات کو بھی پیش کیا جائے گا جبکہ اس کی موسیقی بھی بہترین ہے۔

اس فلم کی شوٹنگ کا آغاز کردیا گیا ہے، جس کے حوالے سے ایاز سموں نے کہا کہ 'فلم کی شوٹنگ میں شدید مشکلات کا سامنا کرنا پڑ رہا ہے، ہاکس بے پر شدید گرمی اور دھوپ میں فلم کے چند مناظر شوٹ کیے گئے'۔

دلچسپ بات یہ ہے کہ اس فلم میں ایک بین الاقوامی اسٹار کو بھی پیش کیا جائے گا، تاہم ابھی ان کے نام کا اعلان نہیں کیا گیا۔

ایاز نے بتایا کہ وہ مزید دو فلموں بھی سائن کرچکے ہیں، تاہم ابھی اس حوالے سے کچھ بتا نہیں سکتے۔